Tiranë, 9 dhjetor, NOA – Pas akuzave të kryetarit të Partisë Socialiste për shtyje të qëllimshme të seancës së sotme, Zyra e Shtypit e Kuvendit ka shpërndarë për mediat procesverbalin e mbledhjes së Konferencës së Kryetarëve, kur janë të gjitha debatet mes përfaqësuesve të dy forcave për shtyrjen e seancës.
Në materialin e mbledhjes së datës 6 dhjetor rezulton se përfaqësuesit e PS-së, Namik Dokle dhe Saimir Tahiri kërkojnë zhvillimin e seancës për të diskuar për ngritjen e komisionit hetimor. Ndërkohë që propozimi i PS-së për paketën ligjore për përmbytjet nuk përmendet.
Më poshtë procesverbali i plotë i Konferencës kryetarëve më datën 6 dhjetor.
PROCESVERBAL
Datë 6.12.2010, ora 10:00
Drejton Mbledhjen
JOZEFINA ÇOBA TOPALLI – KRYETARE KUVENDI
Rendi i ditës:
Shqyrtimi i kërkesës së një grupi prej mbi 35 deputetësh me objekt ngritjen e një komisioni hetimor për hetimin e shkeljeve të ligjit në përgatitjen dhe zhvillimin e zgjedhjeve për Kuvendin e Shqipërisë, qershor 2009.
Të pranishëm:
Znj. Jozefina TOPALLI Kryetare Kuvendi
Z. Ardian TURKU Zëvendëskryetar Kuvendi
Z. Namik DOKLE Zëvendëskryetar Kuvendi
Z. Astrit PATOZI Kryetar i Grupit Parlamentar të Partisë Demokratike
Z. Saimir TAHIRI Zv/Kryetar i Grupit Parlamentar të Partisë Socialiste
Z. Genc POLLO Përfaqësues i Këshillit të Ministrave
Z. Lefter KOKA Kryetar i Grupit Parlamentar “Lëvizja Socialiste për Integrim”
Mungojnë:
Z. Nasip NAÇO Zëvendëskryetar Kuvendi
Të ftuar: Kryetari i Komisionit të Ligjeve, z. Ilir Rusmali.
JOZEFINA TOPALLI: Mirëdita! E kam thirrur këtë mbledhje për shqyrtimin e kërkesës së Grupit Parlamentar të Partisë Socialiste, për ngritjen e një komisioni hetimor për hetimin e shkeljeve të ligjit në përgatitjen dhe zhvillimin e zgjedhjeve për Kuvendin e Shqipërisë, qershor 2009.
Në bazë të nenit 7 të ligjit “Për funksionimin e komisioneve hetimore të Kuvendit”, Kryetari i Kuvendit, jo më vonë se 5 ditë nga data e marrjes së kërkesës mbledh Konferencën e Kryetarëve, për të diskutuar mbi kërkesën e nismëtarëve.
Kërkesa është dorëzuar ditën enjte, datë 2 dhjetor. Konferenca duhet të diskutojë përbërjen e komisionit dhe caktimin e datës së miratimit në Kuvend. Kur Konfernca nuk arrin në një konsensus, për caktimin e elementëve të mësipërm, çështja i adresohet seancës plenare ku votohet me shumicën e anëtarëve të pranishëm. Kërkesa paraqitet për miratim në seancën plenare më të afërt por jo më vonë se 15 ditë nga data e mbledhjes së Byrosë Parlamentare. Brenda 7 ditëve nga miratimi i vendimit komisioni fillon punën. Urdhëroni z. Patozi.
ASTRIT PATOZI: Unë mendoj se data 23 do të ishte data më e përshtatshme për shqyrtimin e kësaj kërkese në seancë plenare.
NAMIK DOKLE: Në bazë të ligjit, përcaktohet në seancën më të parë por pa kaluar 15 ditë nga mbledhja e Konferencës. Kërkesa paraqitet në seancën plenare më të afërt, thotë ligji. Nëse ju do e mblidhni pas 15 ditësh Kuvendin është tjetër punë. Nëse mblidhet të enjten duhet të diskutohet. Nëse për arsye të ndryshme Kuvendi nuk është i mbledhur, për 15 ditë është i detyruar të mblidhet. Kur është në punë normale në seancën më të afërt merret vendimi. Edhe po nuk morrëm ne vendim në seancën më të afërt kjo do të diskutohet. Në kuptimin e interpretimit të ligjit është krejt normale. Nëse nuk do ketë seancë këtë të enjte është tjetër gjë.
ARDIAN TURKU: Unë mendoj se nëse kjo realizohet brenda 15 ditëve, nuk besoj se dalim jashtë rregullores. Në kushte normale nëse zhvillohej në seancën më të afërt nuk do të kishte asnjë lloj problemi. Ne e dimë që pothuaj gjithë qeveria është spostuar në Veri, e gjithë deputetët janë shpërndarë në zonat e tyre. Unë mendoj se çdo grup parlamentar ka për të diskutuar rreth kësaj çështje. Nëse kjo kërkesë për hetim vjen që nga shtatori i vitit të kaluar nuk besoj se na prish punë një javë më tepër e një javë më pak, e nuk besoj se dalim jashtë rregullores.
NAMIK DOKLE: Jam dakord me këtë që thoni ju se nuk na prish punë një javë, por ama ne s’kemi të drejtë të dalim mbi ligjin. Prandaj thuhet kërkesa paraqitet për miratim në seancën plenare më të afërt por jo më vonë se 15 ditë nga data e mbledhjes së Byrosë. Nëse këto që thoni, bëjnë që seanca të mos zhvillohet, ne s’kemi asnjë kundërshtim.
JOZEFINA TOPALLI: Të enjten ne mund të diskutojmë ligje, por mund të mos votojmë për shkak të situatës. Situata atje është katastrofike. Rendi i ditës do të zhvillohet. Ndoshta nuk e drejtoj unë, por mendoj që diskutimi të bëhet. Kalendari do të respektohet por vështirë të bëjmë votim.
SAIMIR TAHIRI: Kjo është një kërkesë që axhendën e parlamentit e vë në një trysni prej shumë kohësh. Besoj se do të ishte në nderin e Kuvendit ta votonte në seancën më të afërt. Në rast se ju thoni se në seancën e ardhshme për shkak të situatës, nuk do të jetë i mundur votimi i asnjë projektligji, kjo është diçka tjetër. Nësë zhvillohet seanca është mirë që kjo çështje të votohet.
JOZEFINA TOPALLI: Ka një traditë parlamentare ku ka edhe seanca plenare që diskutojnë e nuk votojnë. Nëse do të vendoset që ditën e enjte të mos ketë seancë, unë do t’ju vë në dijeni. Unë e thashë me vullnetin e mirë që seanca të zhvillohet por kësaj nuk i dihet.
SAIMIR TAHIRI: Është mirë që ne ta parashikojmë në kalendar. Nëse ndjek fatin e ligjeve të tjera të parashikuara për atë ditë kjo është gjë tjetër. Në të bëjmë parashikimin.
NAMIK DOKLE: Nëse nuk votohet asgjë e shtyjmë edhe këtë votim. Por ama duhet ta parashikojmë.
JOZEFINA TOPALLI: Tani do të flas në emrin personal e si deputete e Shkodrës. Mos më shihni si Kryetare. Kjo është një kërkesë që përsëritet prej dy vjetësh e ju e keni sjellë në datën 2 dhjetor. Mendoj se ka disa gjëra në këtë kërkesë që duhen shqyrtuar mirë megjithëse ky është mendimi im personal e nuk e di se si do të vendosë grupi parlamentar. Prandaj kërkesa do kohën e saj për tu shqyrtuar. Unë nuk besoj se do të kem kohë për tu marrë me të. Por nuk mund të diskutohet në seancë, kur unë nuk jam në seancë e kur shumë ministra nuk janë në seancë. E mira është të mbetemi serioz. Unë nuk e di nëse do të bëhet të enjten seancë. Kam gjithë vullnetin që seanca të zhvillohet, por nuk mendoj se do të votohet pasi shumica e deputetëve janë në terren. Rregullorja na ka lënë një afat prej 15 ditësh.
NAMIK DOKLE: Ne ofrojmë gjithë mirëkuptimin tonë që ti jepet përparësi diskutimit situatës së përmbytjeve. Ne nuk këmbëngulim në kërkesën tonë. Por nëse ekziston mundësia që të bëhet seanca e të bëhet votimi atëherë ne jemi brenda ligjit për ta votuar këtë kërkesë.
JOZEFINA TOPALLI: Absolutisht nuk ka mundësi të diskutohet për dy javë një çështje që mbahet peng prej dy vjetësh. Absolutisht nuk mund të votohet. Rregullorja thotë “brenda 15 ditëve”. Do ta shqyrtojmë në datën 23, sipas rregullores.
NAMIK DOKLE: Këtë e thotë ligji. Nuk është ndonjë gjë e rëndë edhe nëse votohet për dy javë, por gjithsesi, nëse do të ketë seancë ne bëjmë gabim ta shmangim këtë nga seanca. Është tjetër gjë nëse votohet apo jo. Kjo që ne propozojmë është një mënyrë elegante që ligji të mos shkelet.
ASTRIT PATOZI: Meqë ju e keni merak të mos shkelet ligji, duke patur parasysh situatën e rëndë në Shkodër ne e kemi shumë të lehtë bashkarisht, të respektojmë nenin 7 pikën e parë i cili thotë se Konferenca e Kryetarëve cakton përbërjen e komisionit dhe datën e miratimit të tij në Kuvend. Për shkak të situatës ne mund të thonim se data do të jetë filan datë dhe mbyllet kjo histori. Nuk do të kishte më nevojë për komente. Unë nuk dua të merrem me përmbajtjen e kësaj kërkese. Po ti rikthehemi kërkesës së mëparshme ju duhet të mbani mend se ne e çuam atë në Komisionin e Ligjeve për të verifkuar kushtetushmërinë e saj. Unë nuk mund ta paragjykoj këtë kërkesë por mund të jetë kundër Kushtetutës. Ne nuk kemi prirjen që ta zvarrismin këtë gjë. Ne thamë që për shkak të situatës ta diksutojmë në datën 23 dhjetor dhe, deri atëherë i kemi ezauruar procedurat, edhe situata do jetë normalizuar. Po të biem dakord për këtë gjithë të tjerat sfumohen.
ARDIAN TURKU: Unë desha të shtoj diçka. Kur fola nuk kisha parasysh vetëm seancën e ditës së enjte. Ky material ka disa pika me të cilat deputetët duhet të njihen. Ditën e seancës shqyrtohen ato projektligje që janë diskutuar me javë të tëra në komisione. Kjo pikë për tu përfshirë në rendin e ditës ka nevojë që fillimisht deputetët të njihen me të. Që në momentin e parë këtu unë shoh: hetimi i dyshimeve dhe pretendimeve. Partitë politike mund të kenë dyshime sa të duan, unë nuk kam pse të hetoj dyshime. Deputetët nuk kanë kohë që ta shqyrtojnë këtë kërkesë. Mendoj se ekziston justifikimi që të jepet më tepër kohë për tu njohur me këtë material e të jemi serioz në diskutimet që do bëjmë. Nëse është fjala që do ngrihet apo jo komisioni hetimor, nuk diskutohet që ne do jemi po, të gjithë.
JOZEFINA TOPALLI: Konferenca është mbledhur në zbatim të ligjit, pra brenda 5 ditëve dhe ka gjithë të drejtën t’ia dërguar Komisionit të Ligjeve apo për të vendosur për datën e shqyrtimit.
SAIMIR TAHIRI: Ne po diskutojmë mbi çështje që parashikohen fare mirë nga ligji. Në rast se është çështje domosdoshmërie për ta shtyrë seancën për shkak të situatës emergjente dhe angazhimeve të deputetëve, besoj se do të gjeni konsensus të plotë edhe në Konferencë edhe nga Grupi Parlamentar për të mos zhvilluar seancë fare. Pasi edhe deputetët e PS-së ndodhen në zonat e tyre. Po nëse zhvillohet një seancë plenare normale është në nderin e kësaj mazhorance, të parashikojë edhe këtë kërkesë e cila mban nën presion axhendën e Kuvendit si dhe mban në këmbë një krizë politike që e theksojnë raportet e ndërkombëtarëve. Pra, është në nderin e Kuvendit që ta parashikojë në rendin e ditës së seancës. Në rast se pretendimi juaj ka të bëjë me thelbin e kërkesës, që të merrni kohë të njiheni apo ta shqyrtojë Komisioni i Ligjeve kjo është temë tjetër që s’ka të bëjë me situatën emergjente. Nëse ju doni që të ndjekë fatin e kërkesës së mëparshme le të kalojë në Komisionin e Ligjeve por të mos lidhet me gjendjen e jashtëzakonshme. Janë dy gjëra të ndryshme. Ne kemi disponibilitetin tonë të mos zhvillohet fare seanca por nëse bëhet, të jetë edhe kjo kërkesë duke përmbushur kështu edhe kushtin ligjor. Në rast se zhvillohet votim do të votohet edhe kjo. Në rast se ju duhet kohë është tjetër gjë dhe hajt ta diskutojmë.
NAMIK DOKLE: Nëse situata është aq e rëndë sa të mos zhvillohet seancë të enjten ne jemi dakord. Edhe nëse zhvillohet seancë por nuk bëhet votim edhe kërkesa jonë le të ndjekë fatin e projektligjeve të tjera. Edhe nëse nuk është asnjëra nga këto se kërkohet kohë ose diçka tjetër kryetari i grupit parlamentar i cili thotë tani se i duhet kohë, le të thojë në seancë se duhet kohë, ta shohë Komisioni i Ligjeve apo diçka tjetër. Unë mendoj që të shprehet në parim se është dakord për komisionin ndërsa modalitetet ti diskutojmë në seancën që vjen. Pra, zbatojmë edhe kërkesën e ligjit për seancën më të afërt zbatojmë edhe të drejtën e Kuvendit që me shumicë të vendos diçka. S’ka pse bëhet konfliktuale diçka që s’ka pse të jetë e tillë. Futet në rendin e ditës e pastaj kryetari i grupit të shprehet e të kërkojë kohë në seancë. Vendimi merret kur ta vendosim. Elementët e afateve për administratën mund ti zgjidhim duke marrë masa paraprakisht që të mos humbet kohë.
ILIR RUSMALI: Unë nuk dua të jem, provokues, por nuk e kam shumë të qartë për të bërë arsyetimin tim, se këtë kërkesë që ne kemi do e trajtojmë si ofertë apo si ultimatum. Ka shumë rëndësi nga ana proceduriale që ta ndajmë këtë gjë. Sa më shumë ju dëgjoj kërkesa më shkon më shumë drejt ultimatumit sesa ofertës. Ultimatumi është një gjë që vjen, dorëzohet në tavolinë, lihet afati e pastaj do të ndodhë gjëma. Ju po kërkoni afatin ditën e enjte. Me shumë respekt dhe pa dashur t’ju paragjykoj. Oferta ka përqasje tjetër. Në ofertë thuhet ky është materiali ynë dhe hajde ta diskutojmë, analizojmë, ti futemi përmbajtjes. Mbase jo Konferenca e Kryetarëve se nuk është detyra e saj por ka istrumenta të tjerë që merren me arsyetimin e gjësë. Z. Turku tha unë kam dilema të mëdha, edhe unë kam dilemat e mia, por i kam për pjesët thelbësore të dokumentit. Nuk mund t’ia kalojmë asnjë lloj instance të brendshme këtë kërkesë pa sqaruar njëherë se kush është raporti i pikës tre të projektvendimit për ngritjen e komisionit hetimor. Sepse kështu siç është nuk rri dot bashkë me ligjin. Ky është një arsyetim që bëhet dhe njeriu që jep ofertën e bën këtë arsyetim, pra thotë, hajde të ulemi të diskutojmë e analizojmë, ta vendosim në hierarkinë ligjore e pastaj të konkludojmë. Juve thoni të votohet ditën e enjte e nëse nuk ka seancë këtë të enjten tjetrën. E kjo, në këtë formë, merr formën e ultimatumit e jo të ofertës. Besoj se këtë duhet të na e sqaroni më mirë këtë gjë pasi do këtë patur ndërmend tjetër gjë kryetari i Partisë Socialiste.
NAMIK DOKLE: Z. Rusmali, më pëlqeu dëshira e mirë për të mos provokuar por dolët në një provokim që unë s’dua ta diskutoj fare. Ju nuk dëgjuat fare se çfarë thashë unë. Thamë që kjo kërkesë të futet në rendin e ditës dhe kështu plotësohet kërkesa ligjore e seancës më të afërt, por nuk ngulëm këmbë që të jetë këtë të enjte siç thoni ju. Përkundrazi unë i thashë z. Patozi që të futet në rendin e ditës së enjte, kryetari i grupit ka të drejtë të thojë në seancë që ne sot nuk jemi gati ta marrim këtë vendim. Më pas ndodh ajo që thoni ju, ulemi edhe bisedojmë e të merremi vesh. Ashtu siç do të futen ligjet dhe mund të diskutohen por nuk do të votohen, edhe kjo kërkesë futet në rendin e ditës por nuk diskutohet. Deklarohet se kemi nevojë për kohë për të marrë një vendim. Në këtë kontekst kjo nuk ka asnjë lloj ultimatumi, është ofertë dhe ne kërkojmë që ju ta shqyrtoni seriozisht këtë ofertë. Vendimin e merrni ju si shumicë. Ne përderisa jemi ulur në këtë tavolinë jemi të detyruar t’ju kërkojmë ta përfshini në seancën më të afërt. Po u tha që nuk jemi gati, si për emrat edhe për apekte të tjera, por ndërkohë ne fitojmë kohë duke i paraprirë elementëve organizativë të komisionit, nëse do të ngrihet.
ASTRIT PATOZI: Unë mendoj se ne mund të arrijmë një konsensus dhe besoj se jemi shumë afër. Ajo që unë propozoj është që fillimisht të shmangim retorikën politike se nuk e kemi të nevojshme. Mendoj që edhe ju të jeni në rregull me merakun që keni por ndoshta edhe me detyrën që keni sot, ta votojmë këtë kërkesë në seancën më të parë, kurdo që të jetë. Të njoftohet seanca dhe nuk ka nevojë që të dalë përfaqësuesi i grupit të PD-së dhe të bëjmë retorika, por të njoftohet seanca që diskutimi i kësaj kërkese të bëhet në datën 23, kurdo që të mblidhet seanca, që të jemi në rregull edhe me procedurën edhe me kohën që duhet për miratimin e një kërkese të tillë, në kushte të mirëinformimit të deputetëve.
ILIR RUSMALI: Nuk kam çfarë i shtoj asaj që tha z. Patozi i cili po e trajton si ofertë. Këtë nuk duan të kuptojnë kolegët tanë. Nëse është ofertë, oferta është kompromis, dhe, kompromisi i ul palët në tavolinë, por nuk i çon tek dita e fundit. Zotërinjtë po insistojnë për ditën e fundit. Ky është gabim. Çështja futet në kalendar, dhe përsa kohë nuk përfundon kompromisi nuk përfshihet në kalendar. Individualisht, unë ndiej se jemi përpara një vullneti që kërkon refuzimin e ngritjes së komisionit, jo krijimin e tij. Kjo nuk është luajale ndaj partnerit politik. Nuk është ofertë. Ti duhet të ma shpjegosh ofertën, unë të bëj pyetje e të diskutojmë dilemat e në fund të gjejmë zgjidhjet e ta votojmë. Por ju nuk doni gjënë më të rëndësishme, ju doni vetëm votimin. Ju nuk doni negocimin, pasi nuk thoni se jeni të autorizuar të negocioni. Ky proces shkon përmes negociatës dhe ju këtë nuk e doni. Ju doni vetëm fundin që e kalon ose e rrëzon. Kjo është një përqasje e gabuar që ndikon keq tek proceset tona politike.
SAIMIR TAHIRI: Kam përshtypjen që po e politizojmë më shumë seç duhet këtë çështje që është procedurale. Ka një procedurë, ultimatum që nuk e kemi vendosur ne, e ka vendosur ligji. Kërkesat duhet të ndjekin rrugën që ka përcaktuar ligji. Përndryshe edhe këtë mbledhje nuk e bënim sot për shkak të situatës por e linim për ditë tjetër. Nuk është kështu pasi edhe vetë Kryetarja e nisi këtë mbledhje duke evokuar zbatimin në gërmë dhe subtancë të ligjit e rregullores. Këtë po kërkojmë edhe ne. Nuk shtrohet çështja nëse ne po ofrojmë një ultimatum apo ofertë. Të lutem shumë mos e provoko këtë mbledhje. Këtu bëhet fjalë për të ndjekur një standart që e ka përcaktuar ligji. Ne jemi të qartë për gatishmërinë që ka kjo mazhorancë për ta parë me seriozitet këtë kërkesë. Ne s’kemi hyrë fare në thelb të kërkesës. Ne po themi se seanca e radhës duhet ta ketë në rendin e ditës këtë kërkesë. Nëse nuk do të ketë seancë, apo nuk do të votohet, kërkesa do të ndjekë fatin e ligjeve të tjera. Kërkojmë që kërkesa të futet në rendin e ditës. Nëse rendi i ditës nuk ezaurohet me votim të nëjtin fat ndjek kërkesa. Nëse votohet, mazhoranca le të shprehet që nuk mund ta marrë në shqyrtim për shkaqe që do të parashtrohen. Ky është një kompromis që nuk e bëjmë dot ne këtu, por e bën seanca. Ne duhet të bëjmë detyrën tonë e detyra jonë është ta përfshijmë në rendin e ditës.
ARDIAN TURKU: Ideja ime është që asolutisht ne nuk mund të votojmë një çështje të tillë njësoj si ligjet e tjera që janë në rendin e ditës, pasi e cilësova dhe më parë që projektligjet e tjera kanë javë që janë në komisione, janë diskutuar, kanë qënë në kalendar dhe deputetët janë të gatshëm për ti votuar. Ndërsa për këtë material deputetët nuk do kenë kohë të njihen dhe, nëse ne e përfshijmë në rendin e ditës për ditën e enjte, deputetët nuk mund të votojnë apo diskutojnë në mënyrë të ndërgjegjshme. Ajo që unë po them është që kjo kërkesë nuk mund të ndjekë të nëjtin fat në procesin e votimit si ligjet e tjera.
JOZEFINA TOPALLI: Konferenca është mbledhur që kërkesa të përfshihet në kalendar. Mendoj që Komisioni i Ligjeve duhet ta shqyrtojë. Unë ju kërkoj ju dhe mazhorancës që të filloni negociatat për emrat dhe më pas unë mund të thërras edhe një mbledhje tjetër. Kështu jemi në rregull me ligjin dhe rregulloren. Ndërkohë meqë edhe ju ratë dakord unë një ditë përpara ditës së enjte do t’ju lajmëroj se çfarë do të bëjmë me seancën që të mos ju mbaj peng.
NAMIK DOKLE: Vendoseni si të doni. Ne kërkuam që kryetari i mazhornacës të deklarojë që nuk jeni gati. Ju nuk e bëtë këtë. Është e drejta juaj. Gjithsesi kjo do të jetë në rendin e ditës. E pashtruar, por do të diskutohet. Në vend të diskutohet me qetësi në termat e ofertës, do të diskutohet me nervozizëm. E bëmë gjithë këtë mbledhje dhe nuk vendosëm asgjë, pasi të enjten nëse ka senacë, do të diskutohet kjo çështje edhe pa qënë në rendin e ditës. Ju nuk doni ta arrini këtë mirëkuptim.
JOZEFINA TOPALLI: Më falni por ju a i keni emrat sot?
NAMIK DOKLE: Jo, nuk i kemi.
JOZEFINA TOPALLI: Atëherë unë do të thërras edhe një mbledhje tjetër të Konferencës së Kryetarëve, ndërkohë që ju mund të negocioni për emrat dhe numrin e anëtarëve të komisionit.
Mbledhja deklarohet e mbyllur
a.k/NOA
