Uashington, 10 dhjetor, NOA – Komisioni për Sigurinë dhe Bashkëpunimin në Evropë i Kongresit Amerikan, zhvilloi dje një seancë dëgjimore, për të diskutuar rreth përparimit që është bërë në 7 vende të Ballkanit Perëndimor dhe sfidat me të cilat përballen këto vende në të ardhmen.
I njohur edhe si Komisioni Amerikan i Helsinkit, ky organizëm gjatë diskutimeve të përfaqësuesve të tij konkludoi përfundimin se i gjithë Ballkani duhet të pranohet në Bashkimin Evropian.
Nga ana e tij, zv/ndihmës sekretari i Shtetit për çështjet Evropiane dhe të Euroazisë, Tom Kantrimen, tha se Shtetet e Bashkuara mbeten të angazhuara për përparimin e këtyre vendeve.
“Por në fund të fundit, - theksoi ai, - përgjegjësia për zgjidhjen e sfidave të mbetura bie mbi secilin nga këto vende dhe udhëheqësit e tyre”.
Komisioni Amerikan i Helsinkit, deklaroi ndër të tjera edhe faktin se Shqipëria, Kosova, Maqedonia, Mali i Zi, Serbia, Kroacia dhe Bosnjë-Hercegovina kanë shënuar përparim drejt integrimeve euro-atlantike.
Duke përfunduar se perspektiva e anëtarësimit në Bashkimin Evropian, është një prej motiveve më të forta të mundshme për t’i dhënë shtytje përparimit të deritanishëm në Ballkan.
n.e/NOA
