Romë, 14 dhjetor, NOA – Qeveria italiane, e drejtuar nga kryeministri Silvio Berluskoni, do të bëjë sot një xhiro mbi traun e ekuilibrit.
Kjo pasi ajo do të përballet sot me dy votëbesime, njëri në Dhomën e Deputetëve dhe tjetri në Senat; ku do të vërtetohet në fund nëse do të dijë të qëndrojë sipër tij, apo do të humbasë ekuilibrin dhe do të rrëzohet.
Ai vetë duket mjaft i sigurt dhe aspak dyshues që do ta kalojë këtë sprovë të tij, të krijuar nga opozita.
"Defiçiti publik i Italisë është sot në nivelet më të ulëta në mesin e vendeve të zhvilluara dhe kjo është për shkak të faktit se kjo qeveri ka marrë përsipër përgjegjësitë e veta duke fituar besueshmëri në treg," tha kryeministri italian.
Ndërsa më pas, ka pohuar se nëse e kalon provën e votëbesimit, të gjithë deputetët rebelë të qendrës së djathtë i kanë dyert e hapura që të kthehen tek qeveria e tij.
E nëse ai nuk e kalon këtë xhiro mbi traun e ekuilibrit, u tregua i hapur se pret zgjedhjet e parakohshme në vend.
n.e/NOA
