“Shqipëria kishte para 20 vitesh shumë radhë, që nga radha e qumështit, radha e mollëve dhe e peshkut, këto u hoqën. E vetmja që kishte mbetur ishte kjo nëpër ambasada ku plotësoheshin formularët që refuzoheshin”, tha sot Meta.
Ai u shpreh se për LSI-në kjo është një ditë e veçantë, duke theksuar se qëllimi i kësaj force ka qenë integrimi në Bashkimin Europian.
“Është një ditë e lumtur për LSI-në sepse heqja e vizave ka qenë një premtim dhe angazhimi madhor, ka qenë një nga arsyet se përse ajo është krijuar. Ka qenë një nga arsyet e formimit të koalicionit qeverisës pas zgjedhjeve të qershorit 2009”, tha Meta.
Ai u shpreh se tashmë qytetarët shqiptarë do të jenë të barabartë me qytetarët europian.
“Unë dua të shpreh lumturinë time dhe të LSI-së për arritjen e kësaj dite të madhe për të gjithë qytetarët e vendit tonë, në mënyrë të veçantë për gjithë të rinjtë e vendit. Pas 20 vitesh ndihemi të lumtur që një ndër qëllime e Lëvizjes e Dhjetorit, kjo na motivon për të plotësuar më tej aspiratat”, tha Meta.
a.k/NOA
