Tiranë, 20 dhjetor, UPDATE, NOA – Kryeministri Sali Berisha nuk i ka kursyer batutat dhe ironinë ndaj kryetarit të PS-së, Edi Rama.
Në mbledhjen e Grupit Parlamentar të PD-së ai u shpreh se kreu i PS-së hoqi dorë nga rinumërimi i votave pasi ka kasatat e qarkut Berat, pasi pa se votimet ishin në rregull.
“Morëm vidiot e Beratit, i mori dhe shkëlqesia e tij, se tani pasi është martuar kërkojnë ta quajnë shkëlqesi. Shkëlqesia e tij dhe nuk guxoi t’i dërgoi në Gjykatë si provë. Absolutisht ishin votime të rregullta”, tha Berisha.
Berisha u shpreh se mos pranimi i votave të popullit është modeli më i rrezikshëm në politikë.
“Në politikë mund të rastisësh të bësh gabime, fjale të ëndë, implikime nga të rëndat, por më e rënda nga të gjitha është kur nuk je i përgatitur të pranish verdiktin e sovranit. Ky është dhe njeriu më i rrezikshëm në politike”, tha Berisha.
Ai tha se sjellja aktuale e kreut të PS-së është me e rrezikshme sesa ajo që kanë parë qytetarët.
“Qytetarët e kanë parë atë në plazhet e botës. Por ju garantoj se ajo është lule, në krahasim me këtë që po shohin”, tha Berisha.
Ai u shpreh se Rama duhet të shqyrtojë edhe një herë kërkesën e tij dhe ta përshtatë atë me ligjet e vendit.
a.k./NOA
