Tiranë, 24 dhjetor,, Update, NOA – Jo vetëm fjalori i përdorur nga kryeministri Sali Berisha, por edhe mesazhet që janë dhënë në seancën e djeshme nga mazhoranca, u cilësuan nga kryetari i PS-së, Edi Rama, si shenjë e degradimit të pushtetit.
Në deklaratën për mediat, Rama tha se kreu i qeverisë nuk dha asnjë shpresë për shqiptarët në këto ditë feste. Ai u ndal në të gjitha kategoritë sociale, që sipas tij, sot jetojnë më keq.
Rama theksoi se në atmosferën e Krishtlindjeve, Berisha “dje na tregoi se në çfarë prapambetje të thellë jemi”. Kreu i PS-së uroi shqiptarët për festën e Krishtlindjeve dhe tha se me shfaqje si ajo e djeshmja e kryeministrit ndryshimi i Shqipërisë është shumë afër.
“Një Shqipëri e re, jo vetëm është e mundshme, por është në dorën tonë dhe më afër mund të duket kur sheh shfaqje si ajo e mbrëmshmja”, tha Rama.
Në fjalën e tij Rama ka theksuar se situata në të cilën ndodhet vendi sot ka vetë një arsye dhe lidhet me mos hapjen e kutive.
“Vjedhja e zgjedhjeve ka këputur përfundimisht frenat e mendjes dhe gjuhës së Saliut”, tha ai, duke shtuar se “në kutitë e zgjedhjeve të shkuara lidhet rrënimi ekonomik dhe degradimi i qeverisjes”.
Ai u shpreh se populli nuk e meriton këtë qeveri. “Por a e meriton ky popull këtë qeveri që ka? Nëse do t’a kishte zgjedhur do e meritonin, po pse se ka zgjedhur nuk meriton”, tha Rama.
a.k/NOA
