Prishtinë, 26 dhjetor, NOA-Në një intervistë për Radion Evropa e Lirë, Drejtori i Policisë së Kosovës, Reshat Maliqi ka thënë se e kanë synim që për gjashtë muajt e ardhshëm, të marrin sa më shumë nga fuqia ekzekutive e EULEX-it.
“Synimet tona për gjashtë muajt e parë të vitit të ardhshëm janë që të marrim sa më shumë nga fuqia ekzekutive e EULEX-it që ka edhe në pjesët tjera të Kosovës, e posaçërisht në veri, që të jetë përgjegjësi e Policisë së Kosovës dhe në atë drejtim ne do të punojmë”, u shpreh ai.
Maliqi theksoi se në të gjitha takimet që ka pasur me Policinë e EULEX-it dhe me komandantin e KFOR-it, ka kërkuar që ata njerëz të ndalen, të bastisen dhe për çdo veprim që është në kundërshtim me ligjin, për çdo aktivitet kriminal, edhe të arrestohen. Duke folur për veriun e vendit ai tha se është një operacion i përbashkët, i cili zhvillohet përmes Policisë së Kosovës, Policisë së EULEX-it dhe KFOR-it, është shtuar numri i pikave të kontrollit në qytetin e Mitrovicës, sidomos në pjesën veriore dhe tani një pjesë e kriminelëve, që e dinë se policia ka njohuri për aktivitetet e tyre kriminale, nuk i zgjedhin ato rrugë ku ata mendojnë se ka pika të kontrollit nga ana e policisë dhe KFOR-it.
a.y/NOA
