E hënë, 27 dhjetor, NOA-Kryeministri i Shqipërisë, Sali Berisha, i ka cilësuar si shpifje deklaratat e Beogradit për tregtime në armë gjatë luftës në Kosovë.
Gazeta “Politika” e Beogradit ka shkruar sot se, “Berisha ka qenë një nga tregtarët kryesorë me armë në kohën e luftës në Kosovë, ndërsa shtëpia e tij në Tropojë ka qenë qendër për blerjen e armatimit”.
Në një intervistë për agjencinë e lajmeve AFP, ai ka thënë se, pretendimet e kësaj gazete, që është zëdhënëse e ultranacionalizmit serb dhe avokate e gjenocidit serb në Bosnje dhe Kosovë, nuk janë asgjë tjetër, veçse shpifje raciste.
Në shkrimin e kësaj gazete, emri i Berishës përmendet nga katër dëshmitarë në dokumentet e Prokurorisë serbe për Krime të Luftës.
Këto akuza kreu i qeverisë shqiptare i ka cilësuar si histerinë anti-shqiptare të udhëhequr nga Dik Marti, të cilin e ka quajtur një racist, që pa asnjë provë, është duke u përpjekur të hedhë baltë në luftën e shqiptarëve të Kosovës.
a.y/NOA
