Lushnje, 27 dhjetor, NOA- Ministri Shëndetësisë Petrit Vasili me ftesë të kryebashkiakut të Lushnjës, Albert Sanxhaku ka zhvilluar një vizitë në qytetin e Lushnjes.
Gjatë kësaj vizite ai është njohur me problematikën në sektorin shëndetësor ndërsa ka evidentuar prioritetet e investimeve, me qëllim krijimin e një sistemi shëndetësor modern.
“Bashkia e Lushnjës është një nga bashkitë më të rëndësishme, si në pikpamje të peshës ekonomike ashtu dhe të asaj sociale dhe demografike,” tha Ministri Vasili.
“Qëllimi i vizitës time është të njihem nga afër me disa kërkesa në planin infrastrukturor të cilat kryetari i bashkisë i kishte evidentuar nga kontakti i tij i drejtpërdrejtë me institucionet e shëndetit parësor,” shtoi ministri Vasili.
Ai vlerësoi si më prioritar përmirësimin infrastrukturor dhe rritjen e cilësisë së shërbimit parësor, si një shërbim i drejtpërdrejt me komunitetin.
Ai prezantoi ndërtimin e spitalit të ri në Lushnje si dhe pajisjen e tij me aparaturat bashkëkohore dhe specializimin e personelit mjekësor.
Sipas tij, shërbimi spitalor dhe ai parësor duhet të ecin paralelisht për të krijuar kështu një bërthamë të re të sistemit shëndetësor modern.
Në përfundim ministri i Shëndetësisë, bëri me dije se në fillim të vitit, Spitali i Lushnjës do të pajiset me një skaner cilësor dhe pajisje të tjera spitalore ndërkohë që do të vazhdojë specializimi i personelit brenda e jashtë vendit.
a.y/NOA
