Los Angeles, SHBA 6 Janar 2011 - Detajet që
ish truproja i Majkëll Xheksonit i ka prezantuar në procesin kundër Konrad
Murej, mjekut që akuzohet për vrasje të paqëllimshme të mbretit të muzikës pop,
i kanë tronditur të pranishmit në gjykimin në Los Anxheles.
Truproja Alberto Alvarez deklaroi se dr. Murej e kishte ftuar në dhomën e
gjumit të Xheksonit, ku i ka thënë se diçka ka shkuar keq, dhe i ka urdhëruar
të mënjanojë të gjithë pajisjen mjekësore, përpara se të thërrasë ndihmën e
shpejtë.
Ai tregoi se Xhekson ishte i shtrirë në shtrat me sy dhe gojë të hapur, ndërsa
në trup kishte të lidhur pajisjet e infuzionit dhe kateterin, raporton radio
Free Europe.
Në atë çast, ka thënë Alvarez, në dhomë kanë hyrë dy fëmijtë e Xheksonit, të
cilët kanë shpërthyer në vaj.
Alvarez ka thënë se në atë çast Majkëll Xheksoni i është dukur "i
vdekur".
Ylli i popit vdiq në 25 qershor, 2009. Prokurorët thonë se mjeku i ka injektuar
dozë të tepërt të një lloji të anestetikut, i cili kryesisht përdoret në
spitale.
