Shkodër, 13 janar 2011, NOA – Blutë e Shkodrës kanë vënë në pranga katër persona, të cilët kanë vjedhur rreth 40 biçikleta. Arrestimi i katër hajdutëve ndodhi para një ore pas një operacioni të mirëorganizuar nga efektivët e policisë. Katër personat e arrestuar për vjedhje janë Ndoj Pjetri, 19 vjeç, David Gjolaj, 21 vjeç Dhe dy adoleshentë D. P., 15 vjeç A. Rr., 15 vjeç, të gjithë banues në fshatin Hot i Ri, në Shkodër. Pas hetimeve të policisë rezultoi se katër shtetasit në fjalë në bashkëpunim me njëri-tjetrin, në kohë dhe vende të ndryshme, kanë vjedhur një numër të konsiderueshëm biçikletash. Gjatë kontrollit të ushtruar në banesat e tyre përkatëse, u gjetën dhe u sekuestruan në cilësinë e provës materiale gjithsej rreth 40 biçikleta, ndërkohë që 10 prej tyre ishin të çmontuara. Policia e Shkodrës i bën thirrje qytetarëve të cilëve u janë vjedhur biçikletat që të denoncojnë vjedhjen. mit/NOA
