E shtunë, 15 janar 2011, NOA- Bashkimi Europian i bën thirrje Kosovës që të denoncojë parregullsitë në zgjedhje. Natasha Batler, zëdhënëse e Komisionerit Evropian për Zgjerim, Stefan Fule, tha për mediat se Komisioni Evropian i merr seriozisht akuzat për parregullsi në zgjedhje dhe shpreh shqetësim për raporte të tilla. Të gjitha rastet e manipulimit të zgjedhjeve duhet të adresohen sipas BE-së dhe duhet të vazhdohen procedurat në procesin zgjedhor që nuk ka përfunduar ende. Batler shtoi se çështja e zgjedhjeve, organizimi i tyre dhe parregullsitë që kanë ndodhur do të zënë vend në raportin e progresit për Kosovën, që e publikon çdo vit BE. Ndonëse kritikat dhe pakënaqësitë në zgjedhje trembin kosovarët, përfaqësues të BE-së pohojnë se disa shtete vazhdojnë të kenë rezerva për nisjen e dialogut mes Kosovës dhe BE-së për liberalizimin e vizave, çka është një hap shumë i dëshiruar nga ana e Kosovarëve. a.y/NOA
