E enjte, 20 janar 2011, NOA- Zbulohen planet e ish-kryeministrit serb, Zoran Gjingjiç për ndarjen e Kosovës.
Zoran Zhivkoviç, pasardhësi i tij në krye të partisë, në një intervistë për mediat serbe ka thënë se ish-kryeministri Gjingjiç kishte planifikuar shkëputjen paqësore të Malit të Zi nga Serbia dhe më pas ndarjen e Kosovës.
“Plani në fjalë hasi në kundërshtimin e disa prej zëvendësve të Gjingjiç dhe kabinetit të presidentit të asaj kohe, Vojisllav Koshtunica”, theksoi Zhivkoviç. Sipas tij, pjesë e këtij plani ishte edhe zgjidhja e çështjeve që kishin të bënin me krimin e organizuar, si dhe organizimi i ushtrisë. Zoran Gjingjiç u vra në mars të vitit 2003 nga Milorad Ulemek Legija dhe organizata e tij kriminale e njohur si klani i Zemunit, duke u zëvendësuar nga Zoran Zhivkoviç, i cili mori drejtimin e partisë.
a.y/NOA
