Tiranë, 22 janar 2011, NOA – Në mirënjohje të uniformave blu të Policisë së Shtetit që mbrojtën një ditë më parë institucionin e qeverisë nga aktet e dhunshme të një grupi protestuesish, Këshilli i Ministrave ka vendosur të shpërblejë me një pagë suplementare të gjithë punonjësit e Policisë së Shtetit dhe me katër paga suplementare punonjësit e plagosur të policisë dhe të Gardës së Republikës. Lajmin e bëri publik zëdhënësja e kryeministrit Erla Mëhilli, e cila informoi se pagat do të jepen me një propozim të Kryeministrit Sali Berisha.
“Këshilli i Ministrave ka vendosur të shpërblejë të gjithë punonjësit e Policisë së Shtetit dhe Gardës së Republikës, të cilët morën pjesë në mbrojtje të institucioneve të vendit, me 1 pagë suplementare dhe punonjësit e plagosur të Policisë së Shtetit dhe Gardës së Republikës me 4 paga suplementare”, tha Mëhilli.
Në vijim të deklaratës së saj, zëdhënësja e kryeministrit dënoi gjithashtu edhe gjuhën e përdorur sot nga lidershipi i Partisë Socialiste, Edi Rama.
“Jam këtu për të dënuar edhe gjuhën e përdorur nga organizatori i skenarit të dhunës e vrasjeve, i cili me një gjuhë të denjë vetëm për ata që ushtruan dje dhunën dhe që ishin paguar për të ushtruar dhunë, ofendoi forcat e rendit, që me heroizëm, trimëri dhe vetëmohim i treguan vendit dhe mbarë botës forcën e ligjit dhe funksionimin e shtetit ligjor”, tha zëdhënësja e kryeministrit.
mit/NOA
