Tiranë, 22 Janar 2011 NOA - Me propozim të Kryeministrit të vendit, Sali Berisha, Këshilli i Ministrave ka vendosur të shpërblejë të gjithë punonjësit e Policisë së Shtetit dhe Gardës së Republikës, të cilët morën pjesë në mbrojtje të institucioneve të vendit.
Vendimin e komunikoi Erla Mëhilli, zëdhënëse e Kryeministrit e cila saktësoi se shpërblehen me 1 pagë suplementare dhe punonjësit e plagosur të Policisë së Shtetit dhe Gardës së Republikës me 4 paga suplementare.
Në daljen e saj të posaçme, Mëhilli tha edhe se në emër të Kryeministrit dhe qeverisë që ai drejton, dënohet “gjuha e përdorur sot nga organizatori i skenarit të dhunës e vrasjeve, i cili me një gjuhë të denjë vetëm për ata që ushtruan dje dhunën dhe që ishin paguar për të ushtruar dhunë, ofendoi forcat e rendit, që me heroizëm, trimëri dhe vetëmohim i treguan vendit dhe mbarë botës forcën e ligjit dhe funksionimin e shtetit ligjor”.
e.r/NOA
