Mitrovicë, 23 janar, NOA - Kryetarja e Komisionit Qendror të Zgjedhjeve (KQZ), Valdete Daka, në konferencën e parë të mbajtur të dielën për media, ka njoftuar se të gjitha qendrat e votimeve janë hapur me kohë në Mitrovicë dhe procesi i votimit është duke shkuar në rregull.
Daka, ftoi të gjithë anëtarët e këshillave të vendvotimeve dhe vëzhguesit e akredituar që të veprojnë në përputhje me rregullat e KQZ-së.
Me gjithë reshjet e mëdha të borës dhe motin e ftohtë, në komunën e Mitrovicës ka filluar në orën 07:00 të mëngjesit të sotëm rivotimi për zgjedhjet e para parlamentare, dhe se deri më tani nuk janë vërejtur parregullsi zgjedhore. Me kohë është raportuar se janë hapur vendvotimet e zgjedhjeve të ripërsëritura të 12 dhjetor të vitit të kaluar.
Rivotimi po mbahet me vendimin e Gjykatës Supreme të Kosovës, pas konstatimit të parregullsive në procesin e votimit në të komunë. Për më shumë se 86 mijë votues janë hapur 29 qendra të votimit, me 104 vendvotime, ndërsa në pjesën veriore të komunës, e dominuar nga serbët, janë ekipe mobile për zgjedhjet.
Zyra e Përfaqësuesit Special të Bashkimit Evropian (EUSR) në Kosovë, Pieter Feith sërish do të koordinojë “Vëzhgimin e Zgjedhjeve të Kosovës 2010” për të përcjellë këtë rivotimi. Misioni ndërkombëtar për vëzhgim të zgjedhjeve do të përbëhet prej rreth 40 ekipeve me pjesëtarë të EUSR-së, pjesëtarë të misioneve diplomatike në Kosovë, si dhe diplomatë nga vendet e tjera anëtare të BE-së dhe nga rajoni i Ballkanit Perëndimor.
Për rivotimin në Mitrovicë, KQZ ka akredituar edhe shumë vëzhgues të tjerë.
Në pjesën veriore të Mitrovicës do të hapen katër qendra të votimit, me gjashtë vendvotime - në Lagjen e Boshnjakëve, në Kodrën e Minatorëve, në Vidimiriq dhe Gushavc. Në lagjet veriore, ku jetojnë serbët, zgjedhjet do t’i organizojnë me ekipe mobile IFES-i, kurse nga partitë politike që marrin pjesë në zgjedhje janë dërguar 728 anëtarë për këshillat e vendvotimeve dhe ata kanë të drejtë të dërgojnë edhe nga dy vëzhgues për secilin vendvotim. Sipas medieve serbe, në pjesën veriore edhe këtë radhë janë duke u bojkotuar zgjedhjet nga serbët lokalë.
NOA
