Tiranë, 24 janar 2011, NOA – Ministri i Drejtësisë Bujar Nishani ka diskutuar sot me donatorët e huaj që kontribuojnë në realizimin e reformës në drejtëesi mbi draftin e strategjisë së Drejtësisë. Sipas Nishanit, strategjia për drejtësinë është një kontribut real për forcimin, funksionimin dhe zbatimin e rregullave të shtetit ligjor si dhe respektimin e të drejtave të njeriut.
Ministri Drejtësisë gjatë konsultimit me donatorët theksoi se “Në themel të kësaj strategjie do të jetë, zbatimi i shtetit ligjor si garancia e vetme e respektimit të të drejtave të njeriut dhe si gur themellor i demokracisë ne vend. Kjo strategji ndjek me vëmendje prioritetet që qeveria shqiptare ka në integrimin e saj në familjen evropiane”, tha Nishani. theksoi ministri Nishani.
Ai i konsideroi të një rëndësie të veçantë objektivat që synon kjo strategji, sa i përket krijimit të një sistemi gjyqësor të pavarur, e të paanshëm.
Sipas tij sistemi gjyqësor duhet të respektojë të drejtat dhe liritë e njeriut, të rrezatojë besueshmëri dhe transparencë, duke patur si qëllim rritjen e besimit të qytetarëve tek drejtësia.
Më tej, ministri Nishani shprehu mirënjohjen për donatorët dhe asistencën e shteteve mike në reformën në drejtësi, e realizuar nëpërmjet misioneve të akredituara në vend, OSBE-së, Këshillit të Europës, të cilat kanë mbështetur në mënyrë të vazhdueshme konsolidimin e shtetit ligjor dhe forcimin e institucioneve të drejtësisë.
Draftimi dhe konsultimi me të gjithë aktorët që veprojnë në fushën e drejtësisë synon finalizimin me një dokument të vetëm të projekt – politikave për zhvillimin në vazhdimësi të rolit dhe bashkërendimit të hallkave dhe aktorëve të sistemit gjyqësor. Ministria e Drejtësisë draftoi Strategjinë Ndërsektoriale të Drejtësisë, përgjatë vitit të shkuar.
Procesi ka vijuar me mbledhjen e informacionit, identifikimin e problematikave, vizionit, prioriteteve dhe objektivave strategjike për ta kthyer atë në një dokument të zbatueshëm gjithëpërfshirës.
Sipas MD-së, rekomandimet e dhëna në këtë tryezë do të reflektohen në Planin e Veprimit.
mit/NOA
