Tiranë, 24 janar 2011, NOA – Policia e Shtetit ka njoftuar sot kapjen në kryeqytetin e Austrisë, Vjenë të 35-vjeçarit nga Dibra Hektor Nikolli, i akuzuar për vrasjen e dy personave gjatë vjedhjes së një autobusi në vitin 1996. Policia e Shtetit bën me dije se Hektor (Shaqir) Xheladin Nikolli u arrestua falë bashkëpunimit të Interpol Tiranës me Interpol Vienën, me qëllim ekstradimin e tij drejt vendit tonë.
Mësohet se Gjykata e Shkallës së Parë në Dibër kishte dhënë masën e sigurisë arrest me burg për Hektor Nikollin në 27.10.2009, për veprën penale të vjedhjes me pasojë vdekjen e personave të tjerë.
Ky shtetas ishte shpallur në kërkim ndërkombëtar nga Interpol Tirana, më datë 23.02.2010.
Policia bën me dije se Hektor Nikolli, në 19.11.1996, rreth orës 15:30, në vendin e quajtur “Shënllesh”, të Komunës Reç, dhe katër persona të armatosur kanë qëlluar me armë zjarri në drejtim të autobusit të linjës Peshkopi-Reç, që drejtohej nga shtetasi Rasim Elezi.
Si pasojë e këtyre të shtënave kanë mbetur të vrarë shtetasit Rasim Elezi dhe Asllan Meçe.
Sipas Policisë autorët e kësaj ngjarje pasi janë futur brenda në autobus nën kërcënimin e armëve të zjarrit dhe keqtrajtimit që u kanë bërë pasagjerëve të autobusit kanë grabitur shumën prej 120.000 lekësh, shumë e cila i përkiste administratës dhe asistencës sociale të komunës Reç, të Dibrës.
Shtetasi Hektor (Shaqir) Nikolli, është identifikuar si një nga autorët e ngjarjes pasi ka qenë i pamaskuar.
mit/NOA
