Tiranë, 26 janar 2011, NOA – Zëvendëskryeministri dhe Ministri i Punëve të Jashtme Edmond Haxhinasto vlerësoi pasdite qëndrimin dhe përkujdesjen e partnerëve kryesorë ndërkombëtarë, të Bashkimit Evropian dhe të Shteteve të Bashkuara të Amerikës, për të ndihmuar në gjetjen e një zgjidhjeje për situatën e krijuar pas protestave të dhunshme të opozitës në datën 21 janar. Në një prononcim për mediat zoti Haxhinasto theksoi se përdorimi i dhunës si mjet për arritjen e qëllimeve politike është e palejueshme. Ai siguroi sakaq se qeveria është duke reflektuar, pasi sikundër tha Haxhinasto, qeveria ka shprehur vullnetin për të krijuar të gjitha mundësitë për realizimin e një hetimi ndërkombëtar. Ndërkaq Ministri i Punëve të Jashtme rikujtoi se qeveria reagoi edhe duke anuluar mitingun e saj paqësor të ditës së shtunë. “Ju bëj me dije se qeveria është e angazhuar të realizojë të gjitha detyrimet e saj për kthimin në normalitet të aktivitetit të institucioneve, dhe këtu dua të nënvizoj se tashmë po përfundon plani i punës për realizimin e 12 prioriteteve të Opinionit të Bashkimit Evropian”, tha Haxhinasto. Zëvendëskryeministri nënvizoi se përmbushja e prioriteteve është e domosdoshme, që Shqipëria të vazhdojë në procesin e saj të integrimit e papenguar me mjete dhune. mit/NOA
