Nuk ka patur asnjë tentativë apo mendim për implikimin e Forcave të Armatosura lidhur me demonstratën e 21 janarit dhe zhvillimet në kuadrin e saj, por ka patur sugjerime nga miqtë tanë lidhur me këtë fakt.
Pohimin e ka bërë Ministri i Mbrojtjes Arben Imami. Ai saktësoi se kishin mbërritur “sugjerime të karakterit informues se, a mund të përdoreshin FA-të, pasi në disa vende anëtare të NATO-s, në situata të ngjashme, lejohet angazhimi i tyre”.
Imami siguroi se askush nuk ka dhënë tjetër përgjigje, duke shpjeguar se kështu, “ruajmë autonominë e Forcës sonë të Armatosur, padyshim që tregojmë se kemi një forcë të vendosur të zbatojë ligjin”.
I pyetur në bisedë me gazetarin Blendi Fevziu në Tv Klan, se a mund të përdoret ushtria në kushte të tjera, z. Imami u përgjigj: Jo. FA-të nuk mund të përdoren në kushte të tilla. Vetëm në rrethana të jashtëzakonshme, njësi të veçanta të FA-ve, mund të përdoren për të ruajtur objekte të veçanta, të cilat ndihmojnë çlirimin e forcave të policisë për të kryer detyra të tjera, por që janë detyra që përcaktohen qartë nga ligji.
Më poshtë vijon intervista e plotë:
Përse kjo vizitë e kryeministrit Berisha ishte e rëndësishme për institucionin që ju drejtoni dhe FA-të? Vizita e Kryeministrit ishte e rëndësishme, pasi dha siguri, një siguri që unë ia kisha përcjellë Shtabit që në çastet e para të demonstratës dhe post demonstratës se, FA-të në konflikte të kësaj natyre, në mënyrë konstitucionale nuk mund dhe nuk duhet të ndërhyjnë.
A ka patur presion për të përfshirë Forcat e Armatosura në këtë konflikt? Jo. Nuk ka patur asnjë tentativë apo mendim për implikimin e tyre, por ka patur sugjerime nga miqtë tanë lidhur me këtë fakt.
Sugjerime? Sugjerime të karakterit informues se, a mund të përdoreshin FA-të, pasi në disa vende anëtare të NATO-s, në situata të ngjashme, lejohet angazhimi i tyre. Askush nuk ka dhënë tjetër përgjigje, sikundër ajo që kryeministri deklaroi dhe së fundi. Pra, duke dhënë këtë garanci, ne, padyshim, që ruajmë autonominë e Forcës sonë të Armatosur, padyshim që tregojmë se kemi një forcë të vendosur të zbatojë ligjin.
A mund të përdoret ushtria në kushte të tjera z. Imami? Jo. FA-të nuk mund të përdoren në kushte të tilla. Vetëm në rrethana të jashtëzakonshme, njësi të veçanta të FA-ve, mund të përdoren për të ruajtur objekte të veçanta, të cilat ndihmojnë çlirimin e forcave të policisë për të kryer detyra të tjera, por që janë detyra që përcaktohen qartë nga ligji.
Por jo në vijën e përplasjes, si në rastin e 21 janarit? Jo, në asnjë rast ligji nuk e parashikon këtë.
Por, ish-kryeministri dhe ish-ministri i Mbrojtjes, Pandeli Majko ka bërë kritika të forta lidhur me takimin e kryeministrit Berisha me ju dhe drejtuesit e FA-ve? Vizita e kryeministrit në çdo ministri është krejtësisht normale dhe e natyrshme. Jam plotësisht dakord më z. Majko se, ushtria nuk duhet të implikohet dhe, Kryeministri, nuk bëri asgjë më shumë se dha garanci për këtë fakt. Pikërisht për ti mëshuar këtij fakti se FA-të, nuk mund dhe nuk duhet të implikohen në situata të ngjashme dhe të njëjtin fakt theksova dhe unë në fjalën time. Deklarata ime se ushtria nuk do të dalë nga gazermat është një deklaratë publike që s' ka nevojë për asnjë koment. Kjo garanci jepet nga Kryeministri, ministri i Mbrojtjes dhe, nga ky çast, nuk ka më asgjë për të diskutuar apo kritikuar. Unë e çmoj atë që thotë z. Majko dhe jam dakord që të shprehemi për komunikim. Le të shprehemi për komunikim, por jo për dhunë.
Gjatë vizitë së tij Kryeministri Berisha u shpreh për tentativa për një grusht shteti... Kryeministri është shprehur në vijimësi për këtë fakt.
Sa real është pretendimi për një grusht shteti dhe sa një propagandë politike? Zoti Fevziu, vura re edhe paraqitjen që ju i bëtë çështjes, duke lënë të nënkuptohet se janë retorika politike. Besoj te moderacioni, besoj te qasjet e balancuara, por nuk besoj te relativizmi i fenomeneve. Kur një turmë, pa bërë asnjë cilësim, edhe pse nuk vura re asnjë socialist në formatin që ne njohim në sensin politik, një grup djemsh të rinj të përgatitur mirë fizikisht dhe për përplasje, që në çastin e parë goditi dhunshëm policinë, ky fakt nuk mund të relativizohet.
Lideri i opozitës Rama ka deklaruar se ka qenë policia ajo që ka provokuar demonstruesit Po, e dëgjova që e tha në një intervistë qesharake.
Ç' nënkuptoni me një intervistë qesharake? Sepse e dëgjova të thoshte se u provokuan demonstruesit, kur doli makina speciale që i shpërndante duke hedhur ujë... Argumente që nuk i qëndrojnë asnjë logjike të shëndoshë.
A ka patur një tentativë nga policia për të provokuar demonstruesit? Z. Fevziu, këtë duhet ta thoni dhe dëshmoni ju gazetarët, prokuroria ta dëshmojë. Ne të gjithë pamë policë me uniformë normale shërbime, pa mjete mbrojtëse, të cilët thjesht po ruanin në distancë dhe me qetësi rendin, të cilët u detyruan të tërhiqen si pasojë e gjuajtjes me hunj, gurë, mjete të tjera të forta e, madje, edhe me flamurin kombëtar. Të gjithë e pamë atë skenë, kur njëri prej policëve e mori dhe e ruajti nga sulmet barbare. Pra e tillë ishte ajo turmë, një turmë që s' kishte aspak për qëllim të ngrinte lart flamurin kombëtar, por përkundrazi. Ndërkohë, të gjithë e pamë se policia jo vetëm që nuk provokoi, por përkundrazi reagoi vetëm me mbrojtje pasive, pa sulmuar. Sot, ka më shumë policë të lënduar se sa demonstrues, sigurisht duke përjashtuar rastin fatkeq të tre viktimave. Por, më lejoni që të mbyll temën mbi FA-të. Ne jemi një vend anëtar i NATO-s. Duhet ta kuptojmë, ta absorbojmë mirë këtë fakt dhe të gjithë të sillemi si një vend anëtar i NATO-s, me seriozitetin e një vendi anëtar të NATO-s. Në këtë çast që flasim, rreth 600 ushtarakë shqiptarë shërbejnë jashtë kufijve të Shqipërisë, në Afganistan, Bosnjë e gjetkë, pasi janë duke ndërruar njëri tjetrin, për këtë është numër i dyfishuar. A e dini se pse janë ushtarët tanë në Afganistan, z. Fevziu? Për të ruajtur stabilitetin e qeverisë Karzai. Ndërkohë që kryetari i socialistëve, jo gjithë Partia Socialiste, me një grusht njerëzish, u përpoqën të destabilizojnë një qeveri që ka dalë nga zgjedhje legjitime. Kjo është e vërteta z. Fevziu. Dhe për këtë, si qytetar, jam shumë i shqetësuar.
Pse thoni kryetari i socialistëve më një grusht njerëzish? Sepse ashtu ishte z. Fevziu. E pamë të gjithë atë grusht njerëzish, që nuk kalonte në numër më shumë 400-500 vetë.
Ndërkohë ju kishit patur paralajmërime nga vetë kryetari i PS-së, se nuk do ishte në krye të turmave dhe se nuk do t'i frenonte ato. A e kishit menduar se situata do degradonte në këtë formë? Jo. Nuk e kisha menduar dhe si politikan kërkoj ndjesë, pasi ishte një gabim. Në titull institucional, si ministër, nuk e kisha për detyrë që të parashikoja ecurinë e ngjarjes. Por që të jem i sinqertë, nuk e kisha menduar një ecuri të tillë. A e dini pse nuk e kisha menduar? Nuk e kisha menduar pasi personalisht besoj se shoqëria ndërtohet mbi bazën e disa konvencioneve, mbi marrëveshje. Kemi dalë nga gjendja e natyrës. Ky ishte një popull i revoltuar thotë z. Rama! Le të jemi seriozë. Këto janë letrarizma. Dëgjova dhe ato elegjitë, për popullin e varfër, pallatet ku merren vendimet e të tjera si këto! Por në flasim për një botë të institucionalizuar, të formatuar nga ligji, të bazuar në një kontratë që ripërtërihet nga zgjedhje. Dhe këtu të ne është ripërtërirë nga zgjedhje të lira e të ndershme, të cilat janë certifikuar nga të gjitha institucionet ndërkombëtare...
Por të kontestuara nga opozita? Po, por pa prova, pa fakte, të bazuar vetëm mbi dyshimet e z. Rama, gjë që tregon se është kundër sistemit, që nuk do demokracinë, që nuk do stabilitetin, që nuk kërkon zgjidhje për problematika konkrete më mbështetje ligjore, por i është drejtuar së drejtës natyrore.
Që do të thotë? Që do të thotë se z. Rama është ngritur dhe bën grusht shtetit, ti nuk e respekton ligjin e vendit. I është drejtuar thjesht së drejtës që ai mendon se e ka!
Kam një informacion se Shërbimi Informativ i Ushtrisë kishte të dhëna se pritej të kishte trazira. Sa e vërtetë është kjo? Është një fakt që e ka pohuar dhe Kryeministri. Ka patur të dhëna për këto. Ne jemi shumë të shqetësuar në këtë moment se, në situata të tilla anarkie dhe destabiliteti, ne nuk mund të mos pandehim se elementë që lidhen me shërbime të huaja, ndoshta dhe më frymëzime të caktuara ideologjike, të cilët nuk do të dëshironin stabilitet në një vend, cili është anëtar i NATO-s.
Ju thoni se pas këtyre protestave mund të ketë patur frymëzime nga struktura të shërbimeve të huaja? Jo. Nuk thashë këtë. Thashë se shqetësimi ynë, në këto protesta të organizuara nga Edi Rama, të mos infiltrohen edhe elementë të tjerë, të cilët pa dyshim do të ishin në dëm të PS-së, vendit, pra të sigurisë kombëtare. Ky është interesi ynë primar. A mund të thoni se cilat ishin këto të dhëna apo përbën sekret? Jo. Është SHISH apo Ministria e Brendshme që i përpunojnë këto informacione.
Sipas Kryeministrit Berisha SHISH nuk ka paraqitur asnjë të dhënë. Ju lutem, jo sipas Kryeministrit. Nuk mundet asnjëherë të paragjykojmë se Kryeministri nuk thotë të vërtetën. Krejt në të kundërtën, ne duhet të pranojmë se ai thotë të vërtetën. Kryeministri ka cituar, dhe madje unë e kam parë vetë atë dokument, të datës 20 janar, në të cilën i thuhej Ministrisë së Brendshme se "deri në atë moment nuk ka të dhëna", çka nënkuptonte nëse do të ketë, do t' jua bëjmë ato me dije".
A ka patur gërshetim të dhënash mes shërbimeve, pra SHISH, SHIU etj.? Janë agjensi të inteligjencës... Po hyj në një çështje gjerësisht të debatuar. Një nga problemet më kryesore gjatë gjithë këtyre viteve është se, shërbimet, kjo e vërtetuar nga disa ngjarje, nuk rakordohen. Kam një sens institucional shumë të zhvilluar dhe madje them se në të gjithë jemi të dorës së dytë para shtetit. Në këtë kontekst, e kam udhëzuar vazhdimisht drejtorin e shërbimit tonë, që të marrë kontakte të vazhdueshme dhe të krijojë kushte maksimale bashkëpunimi.
A ka patur kontakte? Po.
I referohem sërish asaj që më pohuat se kishit të dhëna nga shërbimi juaj, por se nuk e prisnit atë çka ndodhi. Si e shpjegoni këtë? Ju lutem që të sqarohemi. Kisha menduar se do kishte akte dhune, por ajo që nuk kisha menduar që e shpreha dhe pak më lart, ishte pikërisht ai sulm i organizuar me një grup të trajnuar, i cili mori me vrap bulevardin "Dëshmorët e Kombit" dhe filloi sulmin ndaj godinës së Qeverisë, Kryeministrit dhe e mbajti atë të rrethuar për 5 orë nën presionin e gurëve, mjeteve të forta, madje dhe të makinave për të shpërthyer hyrjen e godinës, armëve dhe eksplozivave të ndryshëm.
A ishte shteti i përgatitur sa duhej për të përballuar këtë situatë? Të them të drejtën, askush nuk kishte menduar se në vitin 2011, një parti e madhe, sikundër PS-ja, mund të organizonte një miting dhe të sulmonte direkt zyrën e Kryeministrit. Është shpesh dhe z. Rama e përdor shpesh si argument se, dhe në Londër, Paris apo Romë ka dhunë. Është e vërtetë se ka dhunë, por ndërkohë ne zbulojmë një fenomen nga pikëpamja e studimit politik, por shumë të dhimbshëm e agresiv këtu. Mblidhen njerëz ekstra parlamentarë, jashtë spektrit politik, me problematika sociale të ndryshme dhe ku sigurisht ushtrohet dhunë: digjen makina, thyhen xhama etj. Policia përpiqet ta mbajë sa më shumë situatën nën kontroll. Së pari, nuk është në krye të tyre asnjë politikan. Së dyti, leja për tubimin nuk është marrë nga partia e opozitës. Së treti nuk justifikohet nga ajo dhe së katërti, ushtrohet i gjithë presioni i nevojshëm për të ndalur dhunën. Ky ishte një plan i qartë, i organizuar të shkojmë të hyjmë më forcë, të destabilizojmë dhë në analiztë të fundit të marrim pushtetin.
Si mund të merret pushteti, duke marrë godinën e Qeverisë? Këtë nuk mund të shpjegojë askush, pasi dhe po të hynte do të dilte prapë. Dhe nuk hyri dhe s ka për ta lejuar kush të hyjë. Ajo që ka kërkuar prej kohësh opozita është vdekja. U tha qartë, madje u tha qartë edhe pse nuk po vdes ndonjë nga deputetët që janë në grevë urie. Këto janë fakte të njohura botërisht. Në intervistën që zoti Rama ka bërë në Top-Channel, botuar të nesërmen në gazetën “Panorama”, pyetjes në këto kushte a do të kemi zgjedhje lokale, ai i është përgjigjur se: "-Do të largojmë Saliun. Ose Saliu do të pranojë një zgjidhje politike, sepse s’mund të kapërcesh të vdekurit". Të vdekurit s’kishin ardhur ende, të vdekurit ndodhën të nesërmen.
Mund t’a ketë thënë në mënyrë figurative. Diskuri politik përgjithësisht është racional nuk mund të jetë figurë. Si mund të themi ne kapërcimi i të vdekurve ose të iki Saliu sepse s’kalohen të vdekurit në mënyrë figurative?! Cilët të vdekur?
Po ata nuk i vrau zoti Rama? Së pari, ne nuk e dimë akoma kush i ka vrarë. Së dyti, ajo që po them është se objektivi ka qenë që nëpërmjet një konflikti, nëpërmjet një tensioni të shtuar, etj., të krijohet situata ku mund të ndodhin edhe aksidente të tilla fatkeqësie.
Pra ju po thoni se Edi Rama ka tentuar të krijoj konflikte dhe aksidente të tilla? Në qofte se, sikundër deklaroi Edi Rama se, po të merret Kryeministria nuk merret pushteti atëherë përse i futi atje?
Ishte populli i revoltuar, nuk ishte Edi Rama. Kjo është ajo dialektika e çuditshme midis kësaj që është lëvizje, gjasme më vete, dhe asaj që është parti. Ky i bashkon bashkë në një vend dhe hajde të mblidhemi shpirt i shenjtë. Është një formulë krejtësisht mistike e zotit Rama. Edhe në Itali apo në Francë që është kultura kontinentale e manifestimit kur dalin liderët, mund të ketë mbi një milion banorë në sheshet e Romës, por ka rregull, ka qetësi. Tregohet fuqia dhe mbështetja për opozitën për një problematikë të caktuar. Por nuk ushtrohet dhunë dhe nuk qëndrojnë mbrapa deputetët apo kryetari i partisë kur ushtrohet dhunë në demostrimet në të gjitha vendet e botës. Kjo ishte e turpshme. Ky ishte akti i fundit që mund të ketë “replay”, cilëndo ditë të premte apo të henë. Por, në fakt është akti i fundit i politikës së re të zotit Rama. Njëkohësisht është kapitullimi i kësaj politike dhe i autorit të saj.
Nëse zoti Rama dhe opozita shqiptare merr përsipër përgjegjësinë për dhunën, a merr shteti shqiptare përgjegjësinë për tejkalimin e të drejtës për mbrojtje, duke shkaktuar tre viktima? Zoti Fevziu, që në momentin e parë që morëm këtë lajm, një lajm të cilin për fat të keq e morëm nga Spitali Ushtarak, i cili nuk u mor dot as nga media as nga askush. Nuk u perceptua, nuk u kap, nuk u njoftua. Sigurisht që vdekja është një lajm i hidhur. Të vdekurit varrosen, është porosi biblike. Sigurisht që me vdekjen askush nuk është i lumtur. Për ta ka vetëm respekt. Nuk i përkasin asnjë partie politike, për personin, jo për aktet. Që nga momenti i parë që japim këtë vlerësim, kemi pasur të qartë dhe duket qartë që policia dhe të gjitha forcat e ruajtjes së rendit kanë qenë të dedikuar për një intensitet sa më të ulët dhune. Kemi thënë gjithashtu që të merret prokuroria ta hetojë. Ta marrë prokuroria dhe le të hetojë mbi këtë çështje, se kush dhe si.
Ka qëlluar Garda e Republikës… Unë nuk mund të përgjigjem dot për këtë gjë. Për sa dimë ne, është se Garda ka qëlluar në ajër me plumba manovre. Por, të gjitha këto janë të parëndësishme. E rëndësishme është që prokuroria të hyjë dhe të investigojë.
Prokuroria ka lëshuar 6 urdhra arresti, por ju nuk keni pranuar. Kur them ju e kam fjalën për qeverinë, Policinë e shtetit, e cila nuk ka pranuar të ekzekutojë urdhrin. Kryeministri shqiptar ka ofruar gatishmërinë më të plotë për këto hetime. Ministri i Brendshëm ka thënë në vijimësi: të merren të pyeten, të merren provat, të merren dokumentet dhe gjithçka tjetër që do t’i shërbejë këtij hetimi.
Ata janë në detyrë… Ata janë në detyrë se po diskutojmë se çfarë do të ndodhë të premten. Unë nuk dua t’a besoj, por askush nuk na ka garantuar dhe ai që duhet të na garantojë është kryetari i PS-së se, të premten apo ditë tjetër, nuk do të përsëritet e njëjta gjë. Në këtë situatë, të arrestosh apo ndalosh, (që është e njëjta gjë, pavarësisht termave teknike formal-juridike), do të thotë të paralizosh Gardën e Republikës dhe faktikisht të kesh dhënë paraprakisht një vlerësim për situatën, për fajtorët dhe përgjegjësit e saj. Gjë, që kur u pyet sot zonja Ina Rama: -“Pse nuk nis një çështje penale për kryetarin e Partisë Socialiste që i grumbulloi", dhe i la në dukje pa objekt, se objektin e kishte dhënë se cili do të ishte, "pse nuk e arrestoi përgjegjësin e kësaj demonstrate?" Pse nuk e bën të njëjtën gjë zonja Rama, pse nuk e nis çështjen kryesisht zonja Rama për një grusht shteti? Absolutisht i takon zonjës Rama, por ka situata që definohen zoti Fevziu dhe në qoftë se del një video dhe ndërkohë që ke me miliarda sekonda, me miliona minuta pamje të një ngjarje të rëndë, të sulmit me mjete dhe armë ndaj godinës së qeverisë, kjo është një çështje për të cilën mund dhe duhet të ngrihet çështje penale.
Po kthehem tek fakti që zonja Rama s’ka nisur çështje penale për këtë, por kërkoi të hetoheshin drejtuesit e Gardës. A përbën një shkelje të ligjit? Jo nuk përbën.
Ju jeni hartues i kushtetutës, një nga hartuesit e kushtetutës ... Unë nuk jam penalist, por megjithatë ekziston një nen i qartë, i cili përcakton që në kur je në një detyrë ekzekutimi i një ndalimi mund të shtyhet.
A është kjo një motiv për të penguar hetimin? Jo absolutisht, sepse i është bërë thirrje nga ministri i Brendshëm që t'i thërrasin dhe të fillojë hetimi, sepse urdhri i ndalimit ka ardhur pa filluar hetimi. Nuk është hetuar akoma, nuk janë marrë në pyetje! Nuk është se u mor gjithë Garda në pyetje dhe, do ishte krejt normale të merreshin, ku kanë qënë në këtë minutë apo orë, cila ka qënë detyra, cili ka qënë urdhri, e më pas të nxirrej konkluzion! Besoj se kaq është mjaft.
Prokurorja e Përgjithshme dhe Ambasadori Amerikan kanë dhënë një konferencë të përbashkët shtypi. Dëshiroj t’ju bëj një pyetje lidhur me atë që konsiderohet ardhja e ekspertëve të huaj për këtë hetim. Si e komentoni këtë konferencë të përbashkët? Ka folur shumë mirë zonja Rama. Ka thënë që nuk i ka kapacitetet për të hetuar dhe, pa patur kapacitetet për të hetuar, ka lëshuar urdhër arresti për gardistët e Republikës. Ajo është koshiente që nuk ka kapacitetet për ta bërë këtë punë. Në qoftë se i ka kapacitetet e nuk e ka bërë është akoma më keq. Por, pa patur kapacitetet ka lëshuar 6 urdhra ndalimi, ndoshta për njerëz të pafajshëm. Ne nuk e dimë ende këtë, mund të dalin edhe të fajshëm. Nuk dua të paragjykoj, nuk dua t’a them as njërën as tjetrën. Është gjë shumë e rëndësishme: ne e mbështesim këtë hetim. Kryeministri ia ka kërkuar, Parlamenti e ka kërkuar, të gjithë e kemi kërkuar.
Parlamenti po bën një hetim paralel. Është ky cënim? Jo, është çështje tjetër. Sigurisht, garancia që profesionistë të specializuar në fusha të tilla, mund të hedhi një dritë mbi çështjen dhe besoj se do ta rrisë besueshmërinë. Por, ne me të drejtë kemi jemi të shqetësuar kur Hysni Burgaj, drejtori i Policisë së Shtetit, i thotë Prokurores se keni lapsuse dhe pas gjysmë ore, del zoti Rama dhe thotë pse nuk i arrestoni për çështje lapsusesh.
Ju po flisni për një lidhje midis Prokurores dhe kreut të opozitës? Mund të ketë dhe një të tretë.
Që është……?! Nuk e di kush mund të jetë.
A keni bërë ju (shteti shqiptar) një padi në Prokurori ndaj drejtuesve të opozitës për dhunën e institucioneve? A ka një gjë të tillë...?
Jo. A duhet bërë? Sepse ju thoni që Prokuroria duhet të nis vetë hetimet duke parë pamjet filmike. Ka një problem që është i natyrës formale dhe teknike. Në momentin që Prokuroria hapi çështjen dhe prokuroria e hapi çështjen që të nesërmen, policia e shtetit nuk mund të bëj më asgjë, nuk mund të hetojë mbi këtë çështje.
A mund të ishte më e përmbajtur Garda e Republikës dhe Policia Shqiptare në ngjarjet e 21 janarit për të shmangur viktimat? Me sa kam parë unë, Garda ishte mjaft e përmbajtur. Hetimi do të tregoj nëse ky pohim është i vërtetë.
Kam përshtypjen se nga deklarimet e bëra nga mazhoranca që prej ditës së diel e në vijim, duket se flitet për një puç ku përfshihet Prokuroria e Përgjithshme – SHISH por lihet të kuptohet edhe Presidenti. Jo. Nuk di të flitet për puçe të kësaj natyre. Është folur për faktin që disa institucione në vlerësimin e Parlamentit, ka fakte që nuk e kanë vlerësuar situatën, siç është rasti i SHISH-it apo siç është rasti i Prokurorisë që nis hetimin jo për grushtin e shtetit, por për viktimat. Ndërkohë, që duhet të niste hetimet njëkohësisht dhe në mënyrë të integruar, për të gjitha problematikat e këtij grushti shteti, përfshi këtu edhe viktimat. Padyshim, askush nuk do që fati i këtyre viktimave të jetë i panjohur.
