Tiranë, 27 Janar 2011 NOA - Kryeministri Sali Berisha priti sot në një takim, Delegacionin e Bankës Botërore të kryesuar nga Menaxheri për Shqipërinë dhe Rajonin për sektorin e Energjisë, dhe shefja e zyrës së Bankës Botërore në Tiranë.
Në fillim përfaqësuesja e BB shprehu keqardhjen për ngjarjet e fundit në Shqipëri dhe besimin për një zgjidhje sa më të shpejtë të situatës.
Në vijim ajo shprehu vlerësimin për punën shumë të mirë të institucioneve shqiptare në fushën e energjisë dhe progresin e bërë së fundmi në sektorin e transmetimit të energjisë dhe sigurinë e digave.
Banka Botërore ka akorduar një financim të rëndësishëm në sektorin e Energjisë prej 165 milionë USD ndërkohë që pritet miratimi i financimeve shtesë prej 22 milionë USD.
Kryeministri shprehu mirënjohjen për ndihmesën e madhe të Bankës Botërore në rritjen e kapacitetit të prodhimit të energjisë në hidrocentralet ekzistuese, si edhe theksoi interesin e qeverisë shqiptare për investime të mëtejshme në projektin e sigurisë së digave. Gjithashtu ai vuri në dukje nevojën për financimin e projekteve rajonale në fushën e energjisë duke përmendur potencialet komplementare të Shqipërisë me Kosovën, si edhe me vendet e tjera të rajonit.
Po aq e rëndësishme është edhe përfshirja e vendeve të Ballkanit Perëndimor në projekte të tjera, për furnizim me energji të financuara nga Bashkimi Evropian.
e.r/NOA
