Tiranë, 3 shkurt, NOA – Rikthehet sot në Tiranë për të dytën herë brenda një jave i dërguari i Bashkimit Evropian, Miroslav Lajçak.
Misioni i tij është ai i realizimit të ndërmjetësimit evropian për të siguruar ndoshta një dialog të pritshëm mes mazhorancës dhe opozitës për zgjidhjen e ngërçit politik të krijuar në vend.
I dërguar posaçërisht nga komisionerja për Punë të Jashtme Katerinë Ashton, diplomati sllovak në Tiranë do të përcjellë mesazhet e takimit të ministrave të Jashtëm të Bashkimit Evropian për nevojën e një hetimi të pavarur për ngjarjet e demonstratës së 21 janarit.
Por edhe atë të detyrimit të përfshirjes së subjekteve politike, në procesin e zgjedhjeve lokale të 8 Majit, kur dihet se opozita po e konteston që tani pjesëmarrjen në to.
Ndërkaq, dje në Shqipëri ka qenë për një vizitë edhe ministri i Jashtëm slloven. Samuel Zgobar, i cili gjithashtu lançoi mesazhin e një dialogu të mundshëm politik mes të dyja palëve.
n.e/NOA
