Kajro, 4 shkurt, NOA – Jo më kot e kanë quajtur “E premtja e Largimit”, pasi sot të gjithë opozitarët në Egjipt presin largimin e presidentit Hosni Mubarak.
Tashmë duket se me një fakt të tillë janë dakord edhe Shtetet e Bashkuara të Amerikës, të cilat në fakt kanë qenë aleate të qeverisë së Mubarakut.
Por duket se zemërimi popullor në Egjipt ka arritur në një masë të tillë që nuk e pranon më asnjë ditë të vetme pushtetin e tij dhe aspak deri në shtator, siç deklaroi ai para dy ditësh, duke cituar shtatorin si muajin e largimit përfundimtar.
Bëhet me dije se konkretisht, Shtetet e Bashkuara të Amerikës kanë filluar bisedimet me zyrtarët egjiptianë për një propozim për dorëheqjen e menjëhershme të Presidentit Hosni Mubarak, ndërkohë që protestuesit anti-qeveritarë përgatiten për demonstrata të tjera ditën e sotme në Egjipt.
n.e/NOA
