Tiranë, 4 shkurt 2011, NOA/ Ariola Ymeraj Fotot update - Pak minuta më parë ka përfunduar edhe në qytetin e Tiranës demonstrata-marshim e opozitës.
Në këtë demonstratë protestues të shumtë të ardhur në kryeqytet nga qytetet përreth kanë marshuar rrugëve të Tiranës me pankarta në duar dhe me thirrje kundër qeverisë.
Nisja e tyre ka qenë pranë Muzeut dhe më pas kanë marshuar nga rruga e Durrësit drejt “Zogut të Zi”.
Në ndryshim në protestat e tjera kjo është quajtur një demonstrat-marshim pasi nuk janë mbajtur fjalime nga ana e përfaqësuesve politikë.
Kreu i socialistëve Edi Rama, ka qenë i pranishëm në protestën që është organizuar në kryeqytet së bashku me disa deputetë të selisë rozë.
Kryeqyteti i vendit i cili mendohet se ka pasur numrin më të madh të protestuesve, e ka mbyllur qetësisht marshimin e tij.
Por në çdo moment turma e marshuesve kanë qenë nën kontrollin e vazhdueshëm të uniformave blu.
Që nga “Zogu i zi”, vend i cili ka shënuar edhe përfundimin e kësaj demonstrate-marshim, qytetarët janë shpërndarë drejt destinacioneve të tyre.
Vetëm para pak minutash ka përfunduar demonstrata-marshim edhe në qytetin e Vlorës.
Të pranishëm në këtë protestë kundër qeverisë kanë qenë deputetët e qarkut nën drejtimin e Gramoz Ruçit
Pika e mbylljes së këtij marshimi mësohet të jetë “Sheshi i Flamurit”, dhe deri më tani nuk ka pasur asnjë incident.
Ndërsa në qytetin e Korçës, demonstruesit janë shpërndarë drejt vendbanimeve të tyre, duke u nisur me autobuza drejt Pogradecit dhe zonave përreth.
Të pranishëm në këtë protestë kanë qenë deputetët socialist të dalë nga ky qark, nën drejtimin e Pandeli Majkos.
Edhe në qytetin e Lezhës pak minuta më parë u mbyll protesta e zhvilluar paqësisht, pasi protestuesit së bashku me drejtuesit e protestës së organizuar, janë shpërndarë.
Por deputeti i këtij qarku Gjok Jaku ka thënë para protestuesve që qytetarët të vazhdojnë të mblidhen në protesta për të rrëzuar qeverinë.
a.y/NOA
[media id=75 width=620 height=440]
