Tiranë, 6 shkurt 2011, NOA – Selia rozë e akuzoi sot Drejtorin e Përgjithshëm të Policisë së Shtetit Hysni Burgaj si një vartës të bindur të drejtuesve të operacionit kriminal të 21 janarit ku mbetën të vrarë tre demonstrues, ndërsa i plagosur i katër i kësaj demonstrate vdiq vetëm dje pas dyluftimit me vdekjen për plot dy javë. Duke iu referuar dëshmisë së djeshme në Komisionin hetimor parlamentar për 21 janarin, deputeti i Partisë Socialiste Pirro Lutaj theksoi në një konferencë për shtyp se “Hysni Burgaj raportoi përpara manekinëve të Saliut në “Komisionin Hetimor Parlamentar”, të pavërteta tronditëse që nuk cënojnë vetëm statusin e drejtuesit të Policisë të një shteti anëtar të NATO-s, por liritë e çdo qytetari të një vendi demokratik në mes të Europës”.
“Nuk mund të ndodhte ndryshe. Ky vartës i bindur i drejtuesve të operacionit kriminal të 21 janarit, Sali Berisha e Lulzim Basha, do të mbronte në mënyrë fanatike gënjeshtrat dhe përkufizimet e palogjikshme të Sali Berishës e Lulzim Bashës, se protestues të pajisur me “çadra pistoletë”, “thika me helm” dhe “gurë të gjetur në bulevard”, organizuan “grushtin e shtetit” dhe tentuan të marrin me dhunë Pushtetin në Shqipëri”, akuzoi deputeti Lutaj, Drejtorin e Policisë së Shtetit.
Lutaj e akuzoi Burgajn se dha një deklaratë miope dhe qesharake kur theksoi se administronte qysh para demonstratës informacione që bënin fjalë për sulm kundër kryeministrisë, kundër godinës së LSI-së, hapje të burgjeve bile dhe sulm ne banesën e kryeministrit.
“Drejtori kukull, që drejton sot Policinë e Shtetit, nën influencat politike të Sali Berishës e Lulzim Bashës dhe që deponon paturpësisht përpara “Komisionit Hetimor”, se demonstruesit para Kryeministrisë nisën goditjen e forcave të rendit, nuk thotë asnjë fjalë se kush e dha urdhrin që të derdhet në mënyrë të papërgjegjshme gazi lotsjellës mbi demonstruesit paqësorë e të pa mbrojtur, shumë nga të cilët nuk kishin mbërritur ende përpara Kryeministrisë”, tha deputeti socialist.
Madje Lutaj akuzoi drejtorin Burgaj se “Nxjerrja e makinës së ujit pa asnjë shoqërues, dëmtimi i forcave të policisë nga gazi lotsjellës, hapja e pjesës ballore të kryeministrisë, duke e lënë pa asnjë forcë policore, dhuna e shfrenuar ndaj kujtdo që kapej ne rrugë, lokale apo dyqane – pa dalluar e pyetur nga vinin - është shembulli më i shëmtuar që Burgaj shërben në verbëri të plotë ndaj urdhërave të Bashës dhe Berishës”.
Partia Socialiste e akuzoi rishtas Drejtorin e Policisë së Shtetit se është një polic me post të lartë dhe me nivel të ulët, duke i bërë me dije se edhe grumbullimi i personave me precedentë penal në 21 janar është një mashtrim i turpshëm, i konfirmuar sikundër tha Lutaj edhe nga verifikimi i mbi 130 personave të ndaluar e keqtrajtuar barbarisht nga ku, askush nuk është konstatuar dhe evidentuar si i tillë.
Ai i bëri thirrje Drejtorit të Policisë së Shtetit Hysni Burgaj se keqpërdorimi i tij nga drejtuesit e vrasjeve të 21 janarit nuk mund të mbulohet me pseudopuçe.
“I themi këtij ushtari nën urdhra, se keqpërdorimi që i kanë bërë atij, drejtuesit e operacionit vrastar të 21 janarit, Lulzim Basha e Sali Berisha, nuk ka asnjë shpresë për tu mbuluar me pseudopuçe. Autorët e vrasjeve makabre të 4 qytetarëve të pafajshëm, plagosja me armë zjarri e dhjetëra të tjerëve në mes të bulevardit “Dëshmoret e Kombit” si dhe autorët e dhunës barbare ushtruar në komisariatet e policisë do të vihen domosdoshmërisht përpara drejtësisë”, përfundoi deklaratën e tij deputeti i PS-së Pirro Lutaj.
mit/NOA
