Tiranë, 9 shkurt, NOA – Nevojë për një zgjidhje sa më të shpejtë të krizës, rivendosje e dialogut politik, një hetim tërësor, profesional dhe i ekuilibruar, që do të vërtetonin funksionimin e shtetit të së drejtës, qëndrueshmërinë e institucioneve të pavarura kushtetuese si dhe demokracisë funksionale të një vendi anëtar të NATO-s.
Këto kanë qenë porositë që zv/ndihmës-Sekretari amerikan i Shtetit për Evropën dhe për Azinë, Tomas Kantrimen, i la presidentit të Republikës, Bamir Topi, në kuadër të takimit të përbashkët mes tyre.
Takim i cili si] raportohet për agjencinë e Lajmeve NOA nga burimet presidenciale, u përqendrua në situatën politike të krijuar në Shqipëri, ku në mënyrë të veçantë u trajtuan zhvillimet më të fundit pas 21 janarit.
Presidenti i Republikës, nga ana e tij, thuhet se pasi vlerësoi lart marrëdhëniet e shkëlqyera mes dy vendeve tona mike dhe aleate dhe shprehu mirënjohjen për mbështetjen e ndihmesën e vazhdueshme të Shteteve të Bashkuara, e njohu Kantrimen me qëndrimin e tij institucional të shprehur publikisht.
Kryetari i Shtetit ritheksoi se tashmë po përjetojmë një moment tepër vendimtar, kur drejtësia shqiptare duhet të dëshmojë përpara qytetarëve të këtij vendi integritetin e saj profesional dhe moral, zotësinë për të hetuar, gjykuar e marrë vendime e pavarur nga presionet dhe ndikimet politike.
Presidenti nënvizoi se e vërteta dhe dhënia e drejtësisë janë nevojë dhe domosdoshmëri, madje sot më parësoret për t’i rikthyer qytetarëve shqiptarë besimin tek shteti dhe tek institucionet e tij të pavarura, tek respektimi dhe zbatimi i ligjit dhe të qenit të të gjithëve të barabartë në këtë pikë pa asnjë lloj dallimi.
“Ky do të ishte një kontribut thelbësor në rrugën për zgjidhjen e kësaj krize të pashembullt që pikësëpari duket se ka marrë peng shpresën e shqiptarëve jo vetëm për kapërcimin e saj, por dhe të alternativave që do iu ofrohen atyre nga forcat politike për të projektuar të ardhmen”, - u shpreh Presidenti Topi.
n.e/NOA
