Pogradec, 18 shkurt, NOA – Dy vjedhje aspak të zakonta janë shënuar në rrethin e Pogradecit ditën e djeshme.
E para është ajo e shumës së 250 mijë lekëve që nusja ka vjedhur në shtëpinë e vjehrrit të saj.
Siç bëjnë me dije burime të policisë së Pogradecit për agjencinë e Lajmeve NOA, autorja mban inicialet M.SH, është 24 vjeçe dhe banon në fshatin Buç.
Mësohet se sasinë e lartpërmendur të parave, ajo ia ka vjedhur vjehrrit të saj 70-vjeçar, i cili mban inicialet H.SH.
Ndërsa vjedhja e dytë është kryer nga 44-vjeçari Arben Gjona, banues në qytetin e Pogradecit, ndaj gruas së tij, 37-vjeçare me emrin A.Gjona.
Siç ajo ka denoncuar në polici, ky person i ka vjedhur në banesë 70.000 lekë të reja dhe më pas është larguar.
Vepra penale që rëndon ndaj tij si edhe të të lartpërmendurës për vjedhjen e parë është ajo e “Vjedhjes”, e parashikuar nga neni 134 i Kodit Penal.
n.e/NOA
