Tiranë, 19 shkurt, NOA – Demonstrata e opozitës dhe fjalimi i kreut të PS-së, është cilësuar sot nga deputeti i Partisë Demokratike, Luçiano Boçi, si kthim në vendin e krimit.
“Dje, kryepuçisti Edvin Kristaq Rama u kthye tek vendi i krimit. Ai që thirri, organizoi e realizoi dhunën ekstreme të 21 janarit kundër rendit kushtetues dje u kthye përsëri tek vendi krimit. Edvin Kristaq Rama kryebashkiaku tretë më i korruptuar i botës i kthyer dje tek vendi i krimit ishte i vetmuari i madh”, tha sot në një deklaratë për mediat, Boçi.
Ai theksoi se qytetarët e Tiranës e braktisën kreun e opozitës. “Qytetarët e abandonuan atë që organizoi dhunën e pashembullt të 21 janarit. Qytetarët e Tiranës e të Shqipërisë, e abandonuan atë që sulmoi me bomba molotov më 21 janar, institucionet demokratike e legjitime “, tha ai.
Sipas tij, sjellja e qytetarëve të Tiranës ishte përçmim ndaj “njeriut që dëshironte të ndez flak e tym qytetin e tij, e vendin vetëm pse do pushtet me çdo çmim”.
Boçi shtoi se kreu i PS-së është i trembur nga qëndrimi i qytetarëve.
“Ai, që prej 13 vite mohoi atësinë e kafshatën e gojës të djalit të tij, puçist që rrethoi me zjarr, armë, gurë e hunj Këshillin e Ministrave për 5 orë rresht, për të marrë me dhunë pushtetin, ishte i tmerruar nga braktisja që i bën të gjithë”, tha sot Boçi.
a.k/NOA
