Durrës, 21 shkurt, NOA – Një qytetar maqedonas është arrestuar dje në Portin e Durrësit, pasi akuzohet për një sërë veprash penale në Maqedoni. Personi i arrestuar është Nadi Alimi, 32 vjeç, banues në Tetovë të Maqedonisë.
Ndalimi i tij është bërë dje rreth orës 6:50 nga strukturat e Drejtorisë Rajonale për Kufirin dhe Migracionin Durrës.
Alimi kishte tentuar paraditen e djeshme që të hynte në Doganën e Durrësit, pasi zbriti nga një traget që vinte nga Italia.
Pas kontrollit policia vuri re se emri i Alimit ishte në listën e personave që janë në kërkim ndërkombëtar. Ai është shpallur në kërkim ndërkombëtar nga Interpoli i Maqedonisë më datë 03.07.2009. Pas arrestimit pritet dhe ekstradimi i tij drejt Maqedonisë.
a.k/NOA
