Tiranë, 23 shkurt 2011, NOA - Këshilli i Ministrave miratoi sot gjatë mbledhjes së përjavshme një tjetër vendim për dëmshpërblimin e ish të dënuarve politikë të regjimit komunist, që përcakton masat e dëmshpërblimit për 408 ish të dënuar politikë të regjimit komunist.
Sipas Qeverisë, kërkesat e këtyre ish të dënuarve janë miratuar pasi këta persona kanë përmbushur kriteret ligjore.
Të 408 ish të dënuarit politikë që përfituan dëmshpërblim me vendimin e sotëm kanë vuajtur dënimin me burg nga data 30.11.1944 deri më 01.10.1991, ndërkohë që kanë përfituar edhe familjarët e të dënuarve me dënim kapital (të pushkatuar apo të ekzekutuar).
Shuma e masave financiare e përllogaritur sipas këtij vendimi, në total është 1 355 457 123 lekë.
Kryeministri Berisha theksoi se qeveria do të vazhdojë disbursimet financiare të ish të dënuarve politikë të regjimit komunist, në përputhje me programin e premtuar.
Po sot, qeveria miratoi edhe vendimin për miratimin e strukturës dhe të Organikës së Institutit të Studimeve për Krimet dhe Pasojat e Komunizmit në Shqipëri.
mit/NOA
