E shtunë, 26 shkurt 2011, NOA- Sekretari i përgjithshëm i OKB-së Ban Ki Moon i bëri thirrje Këshillit të Sigurimit të marrë masa për të mbrojtur, civilët në Libi.
“Ka ardhur koha që Këshilli i Sigurimit të shqyrtojë marrjen e hapave konkrete, ndaj Gadafit. Ditët e ardhshme do të jenë përcaktuese për libianët dhe po aq të rëndësishme janë pasojat për rajonin dhe më gjerë’, u shpreh Moon.
Moon kërkoi nga Këshillit i Sigurimit të shqyrtojë një numër alternativash, si vendosjen e sanksioneve tregtare dhe financiare, ndalimin e udhëtimit, embargon e armëve dhe ngrirjen e pasurive libiane në vende të botës.
Këshilli i Sigurimit u takua në Nju Jork disa orë pasi Këshilli i OKB-së për të Drejtat e Njeriut bëri thirrje për fillimin e hetimeve për krime kundër njerëzimit dhe rekomandoi largimin e Libisë nga ky këshill.
Sekretari Ban Ki Moon tha se në Libi janë vrarë më shumë se 1 mijë njerëz. “Personat përgjegjës për vrasjen e njerëzve të pafajshëm duhet të ndëshkohen. Sfida jonë tani është mbrojtja e popullatës civile”, deklaroi ai.
Ndërkaq Shtëpia e Bardhë njoftoi vendosjen e sanksioneve të reja kundër Libisë, duke tërhequr gjithë stafin nga ambasada e saj në Tripoli.
Qeveritë në mbarë botën kanë dënuar udhëheqësin libian Moammar Gadafin për shkallëzimin e masave shtypëse kundër protestuesve të opozitës.
a.y/NOA
