Tiranë, 4 mars 2011, NOA - Kryeministri Sali Berisha ka ritheksuar sot se qeveria e tij është e vendosur që të bëjë realitet ambicien për ta bërë Shqipërinë një vend të zhvilluar në vitin 2017. Shefi i ekzekutivit duke marrë pjesë në përurimin e sallës së transformuar të konferencave pranë Korpusit qendror të Universitetit Politeknik të Tiranës theksoi se përparësia më madhore për zhvillimin e Shqipërisë është arsimimi dhe shkollimi i të rinjve. Kryeministri Sali Berisha duke folur përballë pedagogëve e falenderoi stafin e tyre si dhe shtetin Italian për mbështetjen e dhënë në rinovimin e mjediseve studentore.
Shefi i qeverisë tha se ekzekutivi e ka përparësi arsimin duke garantuar se do të rendet drejt cilësisë së universiteteve.
“Jemi të vendosur të ndihmojmë studentët”, tha kryeministri Berisha.
Zoti Berisha vlerësoi se heqja e vizave ishte një ishte ngjarje historike për shqiptarët.
Ai nënvizoi se integrimi në BE është lajtmotivi i punës së qeverisë shqiptare.
Sipas kryeministrit heqja e vizave do të ndihmojë hapjen e universiteteve shqiptare dhe bashkëpunimin mes tyre dhe universiteteve të huaja.
Duke e cilësuar arsimin si një prioritet të qeverisë, Berisha theksoi se arsimimi dhe shkollimi mbeten thelbësore për zhvillimin e vendit.
Në këto 20 vitet tha kryeministri, kemi bërë shumë hapa drejt lirisë.
Gjatë ceremonisë merrte pjesë edhe ambasadori italian në Tiranë Saba d'Elia.
mit/NOA
