Nga Daniel Scheschkewitz
E enjte, 9 mars 2011, NOA- Në të vërtetë Obama donte ta mbyllte kampin amerikan të të burgosurve Guantanamo. Tani as që bëhet më fjalë për këtë, edhe gjyqet ushtarake do të rifillojnë.
Menjëherë pas ardhjes së tij në post në fillim të 2009-ës presidenti Barack Obama i pati pezulluar proceset e diskutueshme ushtarake kundër të dyshuarve për terrorizëm.
Bashkë me paralajmërimin, se donte ta mbyllte kampin e të burgosurve Guantanamo brenda një viti, ky ishte sinjali i shpresuar në luftimin e terrorizmit: presidenti i ri donte të ndahej nga politika shpërfillëse për të drejtat e njeriut e paraardhësit të tij George W. Bush dhe ta rikthente Amerikën në udhën e virtytit.
Por dy vjet më vonë opinioni botëror dallon se është mashtruar. Obama as nuk e ka mbyllur deri tani kampin e diskutueshëm, as nuk i ka hequr gjyqet ushtarake. Madje as një bazë ligjore e qëndrueshme për to, e cila do t'i kishte hije shtetit të së drejtës SHBA, nuk është arritur të krijohet deri tani.
Dhe ende 170 të burgosur presin në bazën kubane për lirimin e tyre ose për procesin që u takon. Por meqenëse deri tani asnjë shtet i së drejtës në këtë botë nuk është shprehur i gatshëm për t'i pranuar të burgosurit, Obamës i mbetet procedura e vjetër, e diskutueshme, sipas të cilës tani do të zhvillohen madje procese të reja. Thjesht lirimi i organizatorëve të supozuar të atentateve terroriste të 11 shtatorit nuk është opsion.
Obama e ka trashëguar prej paraardhësit të tij Bush problemin e pazgjidhur të "luftëtarëve armiq", të zënë rob, por ndërkohë ai duhet ta marrë vetë përgjegjësinë për të. Edhe kur kishte ende shumicën në kongres, ai nuk hartoi një procedurë ligjore, e cila do të mund të kishte zëvendësuar proceset ushtarake. Tani është tepër vonë për këtë, sepse republikanët e kanë rifituar shumicën e tyre në dhomën e përfaqësuesve dhe do t'ia refuzonin miratimin një ligji të tillë. Në planin e politikës së jashtme Obama duhet ta kishte shfrytëzuar më mirë çastin e përshtatshëm të ardhjes së tij në detyrë, për të detyruar më shumë aleatë që të pranonin të burgosur, të supozuar të pafajshëm.
Në vend të kësaj Obama, i cili ka rënë politikisht në pozita mbrojtëse, është kujtuar me sa duket të mbledhë vota për zgjedhjet e ardhshme presidenciale. Një vendim kundër njërit prej organizatorëve të atentateve terroriste të 11 shtatorit do të ishte për të i mirëseardhur, në rast nevoje edhe sikur të mbante vulën namkeqe “made in Guantanamo”.
DW/NOA
