Tiranë, 11 mars, NOA - Nëse në shumë vende të tjera, imuniteti i zyrtarëve të lartë është i kufizuar, në Shqipëri ai është i plotë dhe kjo ndikon në shumë raste, në krijimin e pengesave për hetime të ndryshme ndaj tyre.
Një fakt të tillë, e ka pohuar sot ambasadori amerikan në Tiranë, Aleksandër Arvizu, gjatë një tryeze të posaçme për reformën në procedurën penale, duke vënë theksin se kjo situatë e krijuar me imunitetin e zyrtarëve të lartë, duhet të ndryshojë.
Më tej, ai ka përmendur edhe çështjen e zvarritjes në kohë të proceseve gjyqësore, duke theksuar se kjo gjë duhet eliminuar sa më shumë të jetë e mundur, pasi përbën një defekt të dukshëm për sistemin tonë të drejtësisë.
“Kërkohen hetime të shpejta dhe jo të zgjasin në pafundësi”, tha ai, duke apeluar se në fakt, gjykimet e shpejta në kohë, i shërbejnë vetë gjyqësorit, pasi reduktojnë edhe kostot e nga ana tjetër, përmirësojnë edhe imazhin e tyre.
Pa harruar edhe ndikimin pozitiv në jetën e qytetarëve me anë të vendimeve që jepen në kohën e duhur për zbatim.
Më tej, ai theksoi se paraqitet mjaft me rëndësi ndryshimi i kodit të procedurës penale, për të mundësuar përmirësime të atyre pikave ku vihen re probleme.
n.e/NOA
