Prishtinë, 16 mars 2011, NOA- Ish-ministri i Transportit në Kosovë Fatmir Limaj dyshohet për krime lufte dhe lidhur me këtë fakt ndaj tij policia e EULEX-it ka bërë gati një fletëarrest.
Fshati Kleçkë, është vendi ku dyshohet se Limaj ka kryer veprime të tilla, ndërkohë që gjatë luftës, ai ka drejtuar Brigadën “Kumanova”.
Ky është rasti i dytë ku ai përflitet për akuza të tilla pasi ai u arrestua vite më parë nga autoritetet e Tribunalit të Hagës, për krime lufte, por që më pas nuk u provuan.
Misioni evropian, EULEX nuk i ka konfirmuar zyrtarisht këto informacione, por një fakt i tillë përflitet në mediat Kosovare.
“Sipas informatave të fundit, ekziston fletarrestimi edhe për Fatmir Limaj, ish-ministër i Transportit dhe aktualisht deputet e nënkryetar i PDK-së. Sipas fletëarrestit, ai është i dyshuar për krime të luftës në Kleçkë”, njofton “Koha”.
Në disa rajone të Kosovës policia e EULEX-it ka arrestuar të mërkurën disa persona të dyshuar për krime lufte, ndërkohë që i radhës pritet të jetë ai i deputetit të PDK-së, Fatmir Limaj.
a.y/NOA
