Prishtinë, 17 mars 2011, NOA- Qeveria e Kosovës nëpërmjet një deklarate zyrtare ka shprehur qëndrimin e saj lidhur me akuzat e ngritura për krime lufte ndaj disa prej ish-pjesëtarëve të UÇK-së.
Qeveria e Republikës së Kosovës shprehu shqetësim për veprimet e fundit të EULEX-it, që rezultuan me ngritjen e akuzave për krime lufte ndaj disa ish-pjesëtarëve të Ushtrisë Çlirimtare të Kosovës.
“Ushtria Çlirimtare e Kosovës dhe populli i Kosovës kanë zhvilluar luftë të drejtë, të pastër, ka respektuar normat dhe standardet ndërkombëtare”, thuhet në njoftimin e qeverisë kosovare.
Qeveria e Republikës së Kosovës vlerëson se çdo përpjekje për njollosjen e luftëtarëve të UÇK-së do të dështojë edhe kësaj radhe.
Qeveria e Kosovës është e bindur se këto akuza do të vërtetohen si të pabazuara dhe të shpifura, për arsye se lufta çlirimtare e UÇK-së ka qenë në mbrojtje të vendit dhe popullit tonë.
Më tej thuhet se qeveria është e inkurajuar me bashkëpunimin e të akuzuarve me autoritetet e drejtësisë, dhe është e bindur se kjo është mënyra e duhur për të dëshmuar pafajësinë dhe luftën e drejtë që është bërë për lirinë e vendit.
a.y/NOA
