Prishtinë, 21 mars 2011 NOA – “Vdekja e ish-Sekretarit Amerikan të Shtetit, Warren Christopher, është humbje e madhe për të gjithë popujt liridashës”.
Këtë pohim e bëri sot para vizitës në Shqipëri, Presidenti i Republikës së Kosovës, Behgjet Pacolli, me rastin e vdekjes së ish-sekretarit amerikan të Shtetit, Warren Christopher.
Ai ka ngushëlluar Presidentin e Shteteve të Bashkuara të Amerikës, Barack Obama dhe popullin amerikan për humbjen.
Në telegramin e ngushëllimit thuhet: "Me dhimbje të madhe morëm lajmin për ndarjen nga jeta të ish-sekretarit amerikan të Shtetit, Warren Christopher. Duke qenë një diplomat i kalibrit botëror, ish Sekretari Christopher, ishte në vazhdimësi i angazhuar në promovimin e paqes, lirisë dhe demokracisë në mbarë botën, e në veçanti për rajonin e Ballkanit. Populli i Kosovës i është jashtëzakonisht mirënjohës kontributit të Diplomatit Christopher për promovimin e paqes dhe lirisë nëpër botë, si dhe çmon lart angazhimin e tij në mbështetjen e aspiratave tona për liri dhe pavarësi. Vdekja e ish-sekretarit amerikan të Shtetit është humbje e madhe për të gjithë popujt liridashës. Karriera e tij prej diplomati brilant është model i dedikimit dhe i punës së palodhshme për krijimin e paqes, arritjen e lirisë dhe promovimin e vlerave demokratike nëpër botë. Në emër të popullit të Kosovës ju lutem pranoni ngushëllimet tona të sinqerta”, - përfundon deklarata e kryetarit të Kosovës.
a.b/NOA
