Korçë, 25 mars, NOA – U dilte garant personave të ndryshëm që prisnin në radhë për pasaportat biometrike, se do ndikonte tek punonjësit e kompanisë “Aleat” për t’i marrë jashtë radhe ato, në këmbim të shumave prej 2-3 mijë lekësh.
Por veprimtaria e tij e paligjshme ka rënë në sy të forcave të policisë, të cilat pas një hetimi 2-mujor të nisur ndaj tij, kanë mundësuar arrestimin e tij në flagrancë.
Fjala është për 46-vjeçarin nga Korça, Ajet Islami, i cili ka rënë në pranga pas operacionit të koduar “Pasaporta”.
Ai akuzohet për ushtrimin e veprës penale “Ushtrim i Ndikimit të Paligjshëm ndaj personave Publikë”, e parashikuar nga neni 245/1 i Kodit Penal.
Në cilësinë e provës materiale, këtij personi i janë sekuestruar një pasaportë biometrike, një faturë e shpërndarjes së pasaportave, një sasi parash prej 5.500 lekë, si edhe një telefon celular, ndërsa materialet e përpiluara ndaj tij iu kaluan prokurorisë së Korçës për hetime të mëtejshme.
n.e/NOA
