Tiranë, 26 mars 2011, NOA- E njëjta taktikë si në zgjedhjet e 28 qershorit të vitit 2009-të, Partia Socialiste dhe kreu i saj Edi Rama, janë të fundit në deklarimin e kandidatëve.
Maxhoranca qeverisëse dhe koalicioni i saj “Aleanca për qytetarin”, ka qenë më e hapur lidhur me kandidatët e saj duke i deklaruar hera-herës ata.
Ndërkaq kryeopozitari Edi Rama vetëm ditën e enjte në një emision televiziv pas shumë hamendësimesh shoi kureshtjen e qytetarëve dhe rideklaroi kandidaturën e tij për Bashkinë e Tiranës, ende nuk i ka shpallur kandidatët e bashkive dhe komunave të tjera.
Ndonëse ishte parashikuar që pasditen e sotme selia rozë të mblidhte kryesinë ku do të diskutoheshin dhe vendoseshin emrat e garuesve për zgjedhjet e 8 majit, ajo është shtyrë sërish për ditën e nesërme.
Nga ana e selisë rozë përflitet për disa nga kryetarët e bashkive aktuale të cilët do të rigarojnë.
Ndër ta përflitet emri i Vangjush Dakos në Bashkinë e Durrësi, Shpëtim Gjika në atë të Vlorës, Niko Peleshi në Korçë, Qazim Sejdiu në Elbasan, në Gjirokastër Flamur Bimen.
Por tashmë duket se është bërë traditë që Partia Socialiste i shpall e fundit kandidatët, pasi ka parë edhe lëvizjet e kundërshtarëve.
a.y/NOA
