Tiranë, 27 mars 2011, NOA- Deputeti socialist Taulant Balla reagoi sërish ditën e sotme lidhur me Kompleksin e ri Parlamentar.
“E dëgjuam dje nga përgjigja e para-porositur e spikeres Xhozefinë, se ajo nuk ka asnjë argument bindës që të kundërshtojë faktet e bëra tashmë publike se gjithë procedura për përzgjedhjen e projektit për Parlamentin e Ri, ashtu si edhe shpenzimet marramendëse për rikonstruksionin e sallës aktuale te Parlamentit dhe rikonstruksioni i vjedhur i Qendrës Ndërkombëtare të Kulturës “Pjetër Arbnori”, janë afera korrupsioni e kusarie të këtij pushteti. Plot 2.8 milionë euro të shpërdoruara nga Xhozefina dhe Saliu”, u shpreh Balla.
Sipas tij të gjitha faktet janë kundër kryeparlamentares, ndërsa tha se është e provuar e zezë mbi të bardhë që ende pa u mbledhur komisioni për shqyrtimin e projekteve të Parlamentit të Ri, në Vjenë, miq të kryeministritt, që e dinin se kush do të fitonte prej kohësh.
Balla shtoi se kjo ndodhte në një kohë kur në Tiranë ndërtohej një farsë që do të harxhonte para publike për klientët e oborrit, me reklama e forume false, kur fituesi ishte zgjedhur kohë para kësaj.
Ai theksoi se, ky është një skenar i parë e riparë nga shqiptarët, është një skenar korrupsioni tipik i këtij pushteti, me sekserë, shpërdorim fondesh publike për pagesa miqsh, me konkurse e tendera false dhe me paracaktim të mikut që do marrë projektin pas parapagimit.
a.y/NOA
