Tiranë, 3 prill 2011, NOA – Pas incidentit të ndodhur sot kur policia bashkiake e Tiranës ka dhunuar simbolet e Lëvizjes Socialiste për Integrim dhe është konfrontuar me të rinjtë e kësaj force politike ka reaguar nënkryetarja e LSI-së, njëherësh kandidatja për kryetare e minibashkisë nr. 5 Erisa Xhixho.
Kandidatja e Koalicionit “Aleanca për Qytetarin” shprehu indinjatën ndaj kësaj sjelljeje të Bashkisë së Tiranës duke e quajtur kryetarin e saj Edi Rama si një “Don Kishot i cili lufton kundër simboleve të LSI-së”.
Sipas Xhixhos Lëvizja Socialiste për Integrim është duke respektuar Kodin Zgjedhor dhe institucionet e administrimit të zgjedhjeve.
Ajo tha se ligji parashikon që me regjistrimin e kandidatëve për kryetar minibashkie apo bashkie në Komisionin e Zgjedhjeve fushata është e hapur dhe për këtë sipas saj LSI është brenda rregullave ligjore ku brenda 45 ditëve çdo njeri është i lirë të shprehë opinionin e tij dhe të vendosë simbolet e partisë që ai beson dhe që nesër do ta votojë.
“Nga ana tjetër do të shprehja në emër të LSI-së gjithë indinjatën ndaj sjelljes dhe fobisë që ka z. Rama ndaj simboleve të LSI-së duke u sjellë në këtë mënyrë si një Don Kishot ku në qoftë se Don Kishoti merrej me mullinjtë e erës, z. Rama merret me simbolet e Lëvizjes Socialiste për Integrim”, u prononcua për mediat nënkryetarja e Lëvizjes Socialiste për Integrim.
Ajo theksoi se Tirana ka nevojë për një ndryshim të vërtetë ku Kryetari i Bashkisë të merret me problemet, me shqetësimet e qytetarëve dhe zgjidhjen e tyre.
“Për këtë do të votojnë shqiptarët më 8 maj, për ndryshimin e vërtetë në Tiranë”, tha Xhixho.
Nënkryetarja e Lëvizjes Socialiste për Integrim deklaroi se gjatë momentit të heqjes së flamujve të LSI-së dëshmitarë okularë kanë bërë denoncimet, duke siguruar se LSI do të çojë përpara drejtësisë çdo shkelës dhe çdo provokues të kësaj situate.
mit/NOA
