Athinë, 5 prill, NOA - Shoqata e emigrantëve shqiptarë në Greqi, “Unioni Kombëtar i Emigracionit Shqiptar”, me anë të një letre të posaçme dërguar ministrisë së Punëve të Jashtme, vlerëson nisjen e procesit të aplikimit për pasaporta biometrike dhe karta identiteti në ambasadën shqiptare në Athinë.
Tre anëtarë të kësaj shoqate kanë vëzhguar për disa ditë radhazi procesin e aplikimit të pasaportave dhe kartave të identitetit në ambasadën shqiptare në Athinë.
Pas këtij vëzhgimi, kjo shoqatë vlerëson se ka një organizim dhe përkushtim pune nga gjithë punonjësit e ambasadës për çdo emigrant.
Gjatë vëzhgimit, rezultuan edhe raste kur sekserë të posaçëm kanë tentuar të gënjejnë emigrantë të ardhur nga zona të largëta të Greqisë, duke u shitur atyre bileta false, por këto raste u zgjidhën me shpejtësi nga personeli i ambasadës.
Kjo është hera e parë kur kjo shoqatë e emigrantëve shqiptare në Greqi falënderon diplomacinë shqiptare në Athinë për punën e tyre për të lehtësuar barrën e emigrantëve shqiptarë në Greqi.
Prej dy javësh, me mbështetjen e ministrisë së Jashtme dhe ministrisë së Brendshme, ky shërbim i posaçëm për pajisjen me karta identiteti dhe pasaporta biometrike po u ofrohet pa ndërprerje qytetarëve shqiptarë në Athinë e Selanik, ndërsa së shpejti ky proces do të nisë në Romë e Milano.
n.e/NOA
