Fazano, 9 prill, NOA – “Shqiptarë, derra, të fëlliqur, qelbeni erë, injorantë, më bëni për të vjellë” ...
Këto kanë qenë vetëm disa nga fyerjet ekstreme që një edukatore italiane u thërriste fëmijëve të mitur të kopshtit “Barsento”, në Città della Selva, provinca e Fazanos në Brindizi.
Lajmi tronditës raportohet nga mediat italiane, të cilat me nota kritike paraqesin torturat dhe keqtrajtimet që edukatorja bashkëkombase e tyre, u bënte të miturve, mes të cilëve ishin mjaft shqiptarë, bij emigrantësh që jetojnë në këtë zonë të Italisë prej vitesh.
Menjëherë, prokuroria e Brindizit ka nisur një proces serioz hetimor ndaj saj, nisur nga një kallëzim penal që mbërriti fillimisht nga prindërit e një fëmije të kopshtit.
Më tej, hetuesit, vendosën që ta përgjonin edukatoren e akuzuar prej tyre, duke i vënë kamera.
Ata mbetën të çuditur kur panë përmes saj sesi vërtet edukatorja i keqtrajtonte fëmijët e kopshtit duke u ulëritur si e çmendur “Më keni mërzitur jetën, injorantë, derra” etj.
Madje kamera pa sesi ajo e mori dhe e rrahu keq me shkop një fëmijë 3-vjeçar, pasi e qortoi dhe e poshtëroi me epitete fyese, duke e tërhequr më pas nga veshët dhe duke e vënë të qëndronte në këmbë një cep të klasës.
Por mes të tjerash, ndër akuzat e mundshme kundër edukatores italiane, është edhe ajo për vjedhje pasi dyshohet se ajo mund të ketë marrë ushqimin e caktuar për fëmijët, fshehurazi përditë në çantë duke e çuar në shtëpi ....
n.e/NOA
