Fier, 11 prill 2011, NOA – Bardhosh Myrtaj, i biri i Faik Myrtaj, njëri prej demonstruesve të vrarë në protestën e opozitës në 21 janar është vetëvrarë. Këtë e deklaroi pak më parë policia e Fierit, e cila falë hetimit dhe ekzaminimit të trupit të 22-vjeçarit Myrtaj pohoi se ai është vetëvrarë me pistoletë.
Djali i njërit prej katër viktimave të 21 janarit, u gjet i vdekur me një plumb në kokë pranë shtëpisë së tij, në vendin e quajtur Antenat, në fshatin Kreshpan të komunës Cakran të Fierit.
Bardhosh Myrtaj vuante nga një gjendje depresive pas vrasjes së të atit, 50-vjeçarit Faik Myrtaj, depresion i cili duket t’i jetë përshkallëzuar me kalimin e ditëve deri sa solli edhe marrjen e vendimit të beftë për t’u vetëvrarë.
Tragjedia që preku familjen Myrtaj në 21 janar me vrasjen e Faik Myrtaj pranë selisë së kryeministrisë solli edhe një tjetër mort në shtëpinë e Myrtajve, vetëvrasjen e të birit të tij, 22-vjeçarit Bardhosh Myrtaj.
mit/NOA
