Bukuresht, 12 prill, NOA / Nga Baki Ymeri - Nuk është hera e parë kur vijmë para opinionit shqiptar me të njëjtin titull: “Prezantime të reja shqiptare në gjuhën rumune”, dhe nuk është hera e parë kur revistat rumune i hapin me zemërgjerësi shtyllat e tyre edhe për kulturën shqiptare, duke mos e anashkaluar Kosovën për të cilën Dhimitër Polena theksonte se është “Koka e Shqipërisë”.
I shfletova me kujdes fotografitë e dhembjes së flaktë të vitit 1999, dhe e rikujtova, gjithë helm, atë pranverë të përgjakur, e cila i pati përgjakur edhe ëndrrat e gjithë njerëzve të botës, që, të kapluar nga ankthi, shpërthyen në protesta nëpër meridianet e ndryshme të rruzullit tokësor, duke manifestuar përshpirtjen e tyre për shqiptarët e Kosovës dhe urrejtjen ndaj regjimit barbar serb. Mënyra dhe përmasa e solidaritetit me shqiptarët e Kosovës dhe forca e përbuzjes kundër makinerisë vrastare bëri që, barbaria serbe të ndalej dhe, Kosovës t’i hapej shtegu i lirisë, që u arrit, në saje të pjesëmarrjes së gjerë botërore, që me forcën e zjarrit të hekurt që u derdh dhe ia ndali turrin bishës së egër karpatike. E theksova këtë fakt, në shenjë të mirënjohjes së përjetshme që ne që ua kemi borxh të gjithë popujve të cilët na u ndodhën pranë, në çastet më të vështira dhe, pse të mos e themi hapur se pa ndihmën e tyre, Kosova nuk do të mund të arrinte këtu ku është sot”.
Kështu na shkruan një shkrimtar i zellshëm nga Kosova: Skënder Zogaj, duke shfletuar disa nga fotografitë që ia prezantojmë lexuesit tonë. Kosova ka nderin ta ketë në Bukuresht një mik të madh të saj: Shkëlqesinë e Tij, zotin Sami Shiba, ambasadori fuqiplotë dhe i jashtëzakonshëm i Shqipërisë në Bukuresht. Kosova ka nderin ta ketë edhe një revistë me të njëjtin titull në Bukuresht (“Kosova”), e cila kërkon përkrahje për kontinuitetin e saj. Kosova ka qenë dhe ka nderin të jetë prezente në shtypin e Bukureshtit dhe provincës me një serë reçensionesh dhe vargjesh të poetëve tanë, jo vetëm nga Kosova, por edhe nga Shqipëria dhe diaspora shqiptare. Kështu, revista Dor de Dor (Malli ndaj Mallit), boton në numrin e saj më të ri (Nr. 54,55,56/2011) poezitë e Remzi Limanit „Erë e panjohur” dhe „Kosova”, të dinamizuara me fotografinë dhe shënime për autorin. Po ky autor defilon edhe në faqet e revistës Impact literar përmes kronikës së Victor Steromit “Vargje të frymëzuara që rrokullisen si valët e detit”. Revista Cronica e Jashit, në numrat e shkurtit dhe marsit të lëtij viti, e prezanton Skënder Zogajn dhe Vezir Ukajn përmes reçensioneve të kritikut Marius Chelaru: “Vdektari i një vendi ku koha vjen nga zemra e një ore antke” dhe “Eshtrat e fjalëve duke e kurdisur formulën e jetës dhe vdekjes”.
Në kuadrin e reçensionit “Syri për një lot të madh sa Kosova”, botuar në revistën Impact literar (Nr. 377/2011), Mihai Antonescu nxjerr në pah vlerat lirike të Sadik Krasniqit, poet i Kosovës me banim në Gjermani. Në faqet e së njëjtës revistë, Victor Steromi prezanton antologjinë e përbashkët “Bukuria e bukurive” dhe poezinë “Guri i trollit” (shqip/rumansht) të Sadik Krasniqit. Po kjo revistë, kohë më parë ia pat dhënë publicitet Vilhelme Vranarit dhe Nuri Plakut nga Shqipëri, si dhe vëllimit „Gologota kosovare” të Fehmi Kelmendit nga Zvicra. Radije Hoxha nga Kosova defilon me pesë poezi në revistën Amurg sentimental (Muzgu sentimental, Nr.4/2011), ndërsa Adelina Dokja nga Italia në faqet e revistës Climate literare (Nr. 40/mars/2011) me poezitë “Diamanti i dhembjes”, “Engjëll drite”, “Digjem nga malli” dhe “Natën e mirë”, së bashku me vlerësime eseistike nga Marius Chelarut. Po në këtë numër del edhe artikulli “Anija e fjalëve”, ku Lucian Constantini përshkruan suksesin e përurirmit të Theodor Damianit dhe Xhelku Maksutit në restorantin “Boema 33” të Bukureshtit. Kjo revistë, kohë më parë e prezantoi Monica Mureshanin me librin e saj “Kosova letrare”, ndërsa Revista noua, vargjet e Nexhat Rexhës, Kozeta Zylos, Sabit Rrustemit, Merita Bajraktari McCormack etj. Kaq sa për sot, duke kërkuar falje për të papërmendurit, siç janë Ali Podrimja, Sabri Hamiti, Sali Bashota, Miradije Ramiqi, Sabile Kepmezi-Basha, Basri Çapriqi, Liman Zogaj etj., ngase numri i krijuesve shqiptarë që i fisnikërojnë faqet e revistave rumune (që nga viti 1970 e këndej) është i panumërt.
NOA
