Preshevë, 13 prill, NOA – Kryenegociatorja e delegacionit kosovar në bisedimet me Serbinë, Edita Tahiri, ka pritur një delegacion të përfaqësuesve shqiptarë nga Lugina e Preshevës.
Mësohet se anëtarët e tij i kanë parashtruar asaj disa probleme të popullatës së kësaj zone si liria e lëvizjes së lirë, problemi i tabelave të veturave, mospranimi i diplomave të Universitetit të Prishtinës si dhe dokumentet personale të lëshuara në Kosovë.
“Znj.Edita Tahiri, na shpjegoi dhe ishte shumë e qartë se këto negociata do të jenë vetëm për çështje teknike mes dy shteteve dhe jo politike”, ka pohuar kryesuesi i këtij delegacioni, Riza Halimi, lidhur me këtë takim.
Sipas tij, “me Tahirin kemi këmbyer mendime për bisedimet me Beogradin dhe mundësisht të iniciohen edhe problemet teknike të lartpërmendura për shqiptarët e Luginës së Preshevës”.
Pavarësisht se Halimi pranoi edhe faktin që “problemet e grumbulluara në Preshevë janë probleme që duhet t’i zgjidhë Beogradi me partnerin e vet, pra me autoritetin e pushtetit lokal në Luginë dhe jo Prishtina”.
n.e/NOA
