Tiranë, 15 prill 2011 NOA - Kisha katolike del me një Qarkore për zgjedhjet vendore të 8 majit e firmosur prej anëtarëve të Konferencës Ipeshkvore te Shqipërisë. Katolikët shqiptarë bëjnë thirrje që të marrin pjesë në votime duke e lidhur me argumentet përkatëse fetare.
Më poshtë vijon qarkorja e plotë nga Ipeshkëvinjtë e Kishës Katolike të Shqipërisë:
Më 8 maj qytetarët e Republikës së Shqipërisë janë të thirrur për të votuar në zgjedhjet vendore. Avantazhi më i madh i një shoqërie demokratike është fakti se zërat dhe dëshirat e qytetarëve mund të shprehen, veçanërisht në votime. Atëherë demokracia u garanton qytetarëve mundësinë jo vetëm për të zgjedhur ata që do të qeverisin, por edhe, sikurse ka thënë Papa Gjon Pali II, “...për të kontrolluar qeveritarët e vet, ashtu edhe për t’i zëvendësuar ata në mënyrë paqësore, ku kjo rezulton e arsyeshme”. Gjithashtu në doktrinën e saj shoqërore, Kisha Katolike shpeshherë u ka kujtuar qytetarëve se votimi nuk është vetëm një e drejtë, por edhe një detyrë, në dobi të së mirës së përbashkët.
Në një nga dokumentet më të rëndësishme të Konçilit II të Vatikanit lexojmë: “Kisha mendon se është vepër e lavdishme dhe e nderueshme kur njerëzit kushtohen për të mirën e shtetit dhe marrin mbi veti barrën e përgjegjësisë duke u shërbyer njerëzve” (GS 57). Prandaj na duhet të shprehim vlerësimin dhe mirënjohjen tonë ndaj atyre që, me drejtësi dhe pastërti, angazhohen në politikë duke pasur parasysh të mirën e popullit që i ka zgjedhur për t’i udhëhequr.
Duke ju kujtuar detyrën tuaj, si qytetarë, ju ftojmë të tregoheni të matur gjatë fushatës duke shmangur çdo akt dhune dhe të përdorni mirë votën tuaj për të mirën e përbashkët.
Gjithashtu qysh tani u drejtohemi atyre që do të zgjidhen si kryetarë bashkishë apo komunash dhe u bëjmë thirrje që:
- të luftojnë çdo lloj korrupsioni. Mos të harrojnë kurrë se pozita e tyre i ka vendosur si model drejtësie dhe transparence. Viktimat e parë të një sistemi të korruptuar janë personat më të brishtë dhe të pambrojtur;
- të afrojnë dhe të ndihmojnë më shumë të varfërit, të menjanuarit, të lënët pas dore, të papunët, duke i promovuar drejt një jete më të denjë. Mos të harrojnë se çdo njeri, i krijuar në përngjasimin e Hyjit, ka një dinjitet të pazëvendësueshëm.
Ju urojmë përzemërsisht Pashkët: kjo festë na sjelltë sivjet nje shpresë të re që, të ndriçuar nga drita e Krishtit fitimtar mbi vdekjen, të mund të ndërtojmë së bashku qyteterimin e paqes dhe të vëllazërisë.
