Vlorë, 18 prill, NOA – Forcat e policisë së Vlorës kanë shpallur në kërkim një 44-vjeçar, i cili dyshohet të jetë autori i plagosjes së një të moshuare ditën e djeshme.
Fjala është për ngjarjen e ndodhur dje rreth orës 14:30 në fshatin Mekat-2, komuna e Shushicës në Vlorë, ku për motive të dobëta ka mbetur e goditur me pistoletë në oborrin e shtëpisë së saj 63-vjeçarja me inicialet S.T.
Siç raportohet nga policia e Vlorës për agjencinë e Lajmeve NOA, autori Ismet Ahmetaj, banues në fshatin Vreshtës të Fierit ka qëlluar dhe më pas është larguar me shpejtësi nga vendi i ngjarjes.
Për fat të mirë, aktualisht, e plagosura ndodhet në spitalin e Vlorës jashtë rrezikut për jetën.
Kurse materialet procedurale rreth ngjarjes do t’i referohen prokurorisë së Vlorës për veprën penale “Vrasje me paramendim” e mbetur në tentativë dhe “Prodhimi dhe mbajtja pa leje e armëve luftarake dhe municionit”, parashikuar nga nenet 78 e 22,278/2 të Kodit Penal.
n.e/NOA
