Tiranë, 29 prill 2011, NOA- (Update) Gjatë mbledhjes së qeverisë, kreu i saj, Kryeministri Berisha theksoi se dita e sotme është një ditë e veçantë, pasi u inaugurua fillimi i punimeve të veprës së madhe të vendit pas korridorit të kombit, autostrada Tiranë-Elbasan.
Në fjalën e tij ai shprehu falënderimin për të gjithë faktorët, politik, ekonomik, institucionet kombëtare dhe ndërkombëtare, për fillimin e këtyre punimeve.
“Ftoj kryetarin e opozitës Edi Rama të shkrijë grupin anti-tunel, pasi përpjekja e tij për qëllime politike për të bllokuar projektin e tunelit gjykoj se ishte një akt i gabuar dhe kryekëput jo i duhur. Unë akoma i kam në memorie protestat për tunelin e Kalimashit, megjithatë ftesa ime është miqësore, por besoj që është edhe në interes të tyre”, u shpreh kreu i qeverisë, duke thënë se ndërtimi i autostradës dëshmon për ndryshimet epokale që kanë përfshirë vendin.
Më tej ai tha se taksa e sheshtë nuk mund të preket dhe nuk do të preket, pasi shtoi se qëndrimi i qeverisë është miqësor me biznesin.
a.y/NOA
