Tiranë, 2 maj, NOA – Kryetari i Partisë Socialiste, Edi Rama ka uruar Ambasadorin e Shteteve të Bashkuara të Amerikës, Aleksandër Arvizu për operacionin ushtarak që solli eliminimin e terroristit, Osama Bin Laden.
Në bisedë telefonike me diplomatin amerikan, Rama e ka cilësuar si mjaft pozitiv për paqen në botë një lajm të tillë. Ai është shprehur se “kjo ngjarje është një fitore e madhe ndaj terrorizmit”.
Nga ana tjetër, Rama ka theksuar se “Presidenti Obama mbajti një premtim të madh duke eliminuar rrezikun që kanosej nga ky element terrorist”.
Më herët, Presidenti i vendit, Bamir Topi, i dërgoi një mesazh përgëzimi presidentit Obama, ndërsa kreu i qeverisë, Sali Berisha në një reagim publik e cilësoi këtë ngjarje si një fitore ndaj terrorizmit.
a.k/NOA
